Gamitin ang mga tool para sa co‑host ng Airbnb

Isang pangunahing elemento para magtagumpay bilang bihasang co-host ang pagpapasya kung paano kayo maghahati ng host sa pangangasiwa ng listing.

Pareho ba kayo ng host na magpapadala ng mensahe sa mga bisita, o isa lang ba sa inyo ang bahala roon? Ikaw ba ang mangangasiwa sa buong listing at makikipag-ugnayan ka lang sa host para sa mga partikular na isyu, gaya ng mga kahilingan para sa pagbabalik ng nagastos? Anuman ang mapagpasyahan mo, may mga tool ang Airbnb na puwedeng makapagpadali sa pagiging co‑host mo.

Kapag may host na nag-imbita sa iyo na maging co‑host sa listing niya, papapiliin siya kung ano ang puwede mong ma-access. Kabilang sa mga opsyon ang:

• May access sa lahat
• May access sa inbox at kalendaryo
• May access sa kalendaryo lang

Kapag may access ka sa lahat, magagawa mong: 

• Gumawa ng bagong listing
• Magpadala ng mensahe sa mga bisita at makatanggap ng mga notipikasyon
• I-update ang kalendaryo
• Suriin ang talaan ng transaksyon
• Pangasiwaan ang listing, kasama ang presyo at iba pang detalye
• Pangasiwaan ang mga reserbasyon, kabilang ang pagtanggap at pagtanggi sa mga kahilingan sa pagpapareserba, pagkansela, at kahilingan sa Resolution Center
• Maghain ng kahilingan para sa pagbabalik ng nagastos
• Magdagdag o mag-alis ng iba pang co-host, i-edit ang mga pahintulot, at italaga ang sarili o iba pang co-host bilang pangunahing host ng listing

Tandaang kahit may access ka sa lahat, hindi mo magagawang:

• Mag‑set up o mag‑edit ng payout ng ibang co‑host

• Pangasiwaan ang mga kahilingan para sa pagbabalik ng nagastos kapag naisumite na ang mga ito  

• Suriin o baguhin ang paraan ng payout o impormasyon ng nagbabayad ng buwis ng may-ari ng listing o iba pang co-host

Mainam na gumawa ng plano kasama ang mga host para malaman ninyo kung sino ang tutugon sa mga bisita at mag-aasikaso sa iba pang pakikipag-ugnayan. Posibleng ipagawa sa iyo ng mga host ang lahat, o maaaring mas gusto nilang hatiin ang mga gawain.

Kasama sa mga elemento ng komunikasyon na dapat isaalang-alang ang:

• Pagpapadala ng mensahe araw-araw, pagsagot sa mga tanong, at pagresolba sa anumang posibleng maging isyu

• Pagtugon sa mga kahilingan sa pagpapareserba kung hindi gumagamit ng Madaliang Pag-book ang listing

• Paghahain ng mga kahilingan para sa pagbabalik ng nagastos (pero may-ari ng listing na lang ang puwedeng mangasiwa sa mga ito kapag naihain na)

• Paghingi ng tulong sa Suporta sa Komunidad

• Pangangasiwa sa iba pang co‑host

Ayon kay Sabrina na isang bihasang co-host sa Denver sa Colorado, nakakatulong kapag isang tao lang ang nangangasiwa sa pakikipag-ugnayan sa mga bisita “para hindi pabago-bago ang sinasabi kaugnay ng mga patakaran, gaya sa mga diskuwento, refund, at isyu ng bisita.”

Puwedeng magkaproblema kung walang malinaw na plano. “Kapag may dalawang taong naghahati sa ganitong uri ng gawain, puwedeng magkalabo-labo,” sabi ni Dominic na isang bihasang co-host sa Cornwall sa England. “Sa gano'ng pagkakataon may mga napapalampas, hindi nakakapag-iskedyul ng mga tagalinis, at iba pang katulad no'n.”

Magagamit ng mga host ang mga opsyonal na tool para sa payout ng co‑host para magbahagi ng porsyento o fixed na halaga sa kada booking na iko‑cohost mo sa Airbnb. Puwede silang pumili sa isa sa apat na opsyon sa payout: 

• Ibahagi ang bayarin sa paglilinis 

• Ibahagi ang bayarin sa paglilinis at partikular na porsyento ng halaga ng booking

• Magbahagi ng partikular na porsyento ng bawat payout

• Magbahagi ng fixed na halaga sa bawat payout

Ang may‑ari ng listing lang ang makakapag‑set up ng mga payout. Posibleng may mga limitasyon depende sa lokasyon ng host at co‑host.

Kapag nag‑set up ng payout ng co‑host ang host, may 14 na araw ka para kumpirmahin o tanggihan iyon. Karaniwang mapapag-usapan at mapapagkasunduan ninyo ng host ang halaga at paraan ng payout mo bago siya magpadala ng kahilingan, pero kung tatanggihan mo ang na‑set up na payout, kakailanganin ng host na magpadala ng bagong mungkahi. 

Kapag nakumpirma mo na ang payout, mababayaran ka na para sa mga booking humigit‑kumulang 24 na oras pagkatapos ng pag‑check in. Kung i-update ng may-ari ng listing ang kasalukuyang payout, malalapat lang iyon sa mga booking na magsisimula pagkatapos mong kumpirmahin ang update.

Posibleng nagbago ang impormasyong nakasaad sa artikulong ito mula noong na‑publish ito.