Paano pangasiwaan ang negatibong review mula sa Airbnb

Puwedeng masakit talaga sa damdamin ang hindi magandang review. Gayunpaman, maaaring makatanggap ng negatibong feedback mula sa bisita paminsan-minsan kahit ang pinakamagiliw na host.

May pagkakataon ka palaging magbigay ng pampublikong tugon sa mga review sa iyong listing. Ang pagtugon nang maayos ay nagpapahiwatig na pinapahalagahan mo ang feedback ng mga bisita. Mayroon ding mga hakbang na puwede mong gawin para maiwasang magkaroon ng mga negatibong review.

Sa pamamagitan ng pagsulat ng maikli at magiliw na pampublikong tugon sa negatibong review, maibabahagi mo kung paano ka nagsasagawa ng mga pagpapabuti.

Sinasabi sa amin ng mga bisita na kapag napapansin nilang tumutugon sa feedback ang host, lalo silang nakakampanteng mag‑book dahil alam nilang tumatanggap ng mga suhestyon ang host.

Puwede kang tumugon sa review anumang oras. Narito ang ilang tip sa paggawa ng mainam na tugon:

• Magsimula sa pamamagitan ng pagkumpirmang natanggap mo ang feedback at pagpapasalamat sa iyong bisita. Puwedeng simple lang ito, gaya ng pagsasabi ng “Salamat sa review mo, Mary! Talagang nakakataba ng puso na naglaan ka ng panahon para balikan ang naging pamamalagi mo.”

• Ibahagi kung paano mo pinaganda pa ang patuluyan mo. Maaari mong sabihing “Ikinalulungkot naming hindi komportable ang mga higaan. Mahalagang makatulog ka nang maayos kaya nagdagdag kami ng mga komportableng pamatong sa kutson pagkatapos matanggap ang review mo.”

“Bilang bisita, hindi ko inaasahang may 100% perpektong review ang kahit na sinong host, pero mas napapahanga ako ng mga host na sumeseryoso sa hindi magandang feedback at nagpapamalas ng kagustuhang humusay pa,” sabi ni Andrew na isang Superhost sa Berlin.

Maaaring alisin ang mga review kung lumalabag ang mga iyon sa aming Patakaran sa Pagbibigay ng Review. Puwede kang mag‑ulat ng review na sa palagay mo ay lumalabag sa aming patakaran. Puwede ka ring tumutol sa review na paghihiganti mula sa mga bisitang pinaniniwalaan mong gumawa ng malubhang paglabag sa mga patakaran, kailan man ginawa ang review na iyon.

Naipapaalam na isa kang host na mabilis sumagot kapag nagbigay ka ng pampublikong tugon sa magagandang review.

Kung sa mga negatibong review ka lang tutugon, baka ang mga iyon lang ang mapansin ng mga bisita. Sa halip, tumugon din sa magagandang review. Kahit sabihin mo lang na, “Salamat sa pamamalagi sa patuluyan ko!" puwedeng sapat na.

Minsan, negatibo ang nagiging review dahil lang magkaiba ang mga inaasahan. Sa tuwing magpapatuloy ka ng bisita, may pagkakataon kang mag‑alok ng mahusay na hospitalidad at magsagawa ng ingklusibong pagho‑host.

Wala mang garantiyang hindi ka makakatanggap ng negatibong review, may mga puwede kang gawin para mapabuti ang gawain mo sa pagho‑host.

• Kumuha ng tumpak na mga litrato ng patuluyan mo, kasama ang mga kagandahan at mga hindi kanais‑nais na katangian niyon.
• Gumawa ng tapat na paglalarawan ng listing at mga alituntunin sa tuluyan para maitakda ang mga dapat asahan.
• Ayusin ang paglalarawan ng listing mo para tugunan ang mga isyung binanggit sa mga negatibong review, lalo na ang mga bagay na hindi mo kontrolado, gaya ng ingay sa kalye kung nasaan ang patuluyan mo.
• Gamitin ang feedback para pagandahin pa ang listing mo, gaya ng pagdaragdag ng mga tuwalya kung sinabi ng bisita na kulang ang inihanda mo dati.
• Makipag‑ugnayan sa mga bisita sa buong pamamalagi nila gamit ang Airbnb app para matugunan kaagad ang anumang isyu.

Posibleng nagbago ang impormasyong nakasaad sa artikulong ito mula noong na-publish ito.