Mga tip para sa kaligtasan kaugnay ng liquified petroleum gas (LPG)

Liquified Petroleum Gas (LPG) ang karaniwang tawag sa alinman sa ilang kombinasyon ng likidong gas na sumisingaw at madaling magliyab, gaya ng propane, butene, at butane. Ayon sa National Fire Protection Association (NFPA), karaniwang ginagamit ang LPG para paganahin ang mga kasangkapang gaya ng mga dryer, kalan, ihawan, at heater. Gayunpaman, puwede itong mabilis na magdulot ng panganib kung hindi itatabi o gagamitin nang maayos. Nasa ibaba ang ilang tip na makakatulong sa iyong maiwasan ang mga insidente sa kaligtasan na may kaugnayan sa pagtagas at pagsabog ng LPG:

• Itabi nang maayos ang mga lalagyan ng gas para mapaliit ang posibilidad na tumagas o sumabog ang LPG. Huwag ilagay ang mga ito sa bubong o sa iba pang lugar kung saan puwedeng mapakialaman, masira, o labis na mainitan ang lalagyan.
• Dapat i-install at serbisyuhan ng kwalipikadong tubero o propesyonal ang mga kasangkapang gumagamit ng LPG. Huwag i-install o imentena nang ikaw lang ang kasangkapang gumagamit ng LPG o ang koneksyon o lalagyan ng LPG.
• Dapat ilagay sa labas ang mga lalagyan ng LPG na ginagamit ng mga kasangkapang panloob (mga kalan, heater, dryer, atbp.). Hindi dapat ilagay ang mga ito sa bahay o sa garahe.
• Huwag subukang i-install, baguhin, o kumpunihin ang mga balbula, regulator, pangkonekta, o kontrol sa silindro, o ang mga bahagi ng tangke.
• Ipasuri ang mga mas lumang konektor ng kasangkapan para matukoy kung may mga bitak at sira na puwedeng maging sanhi ng pagtagas ng gas.
• Dapat lang gamitin sa loob ang mga nabibitbit na kasangkapan ayon sa mga tagubilin ng nagmanupaktura.

May inilalabas na natatanging amoy ang karamihan sa mga LPG, hindi gaya ng carbon monoxide. Kung may maamoy kang gas sa loob ng bahay, lumabas ka kaagad at tumawag ng bumbero o mga serbisyong pang-emergency. Huwag bumalik sa loob hangga't hindi ka sinasabihang ligtas nang pumasok.