Pagtanggap sa mga bisitang may mga pangangailangan para sa accessibility

Tinatanggap at sinusuportahan namin ang mga taong may mga pangangailangan para sa accessibility. Dapat na may tiwala ang mga miyembro ng aming komunidad na ang kanilang mga Host ay magbibigay ng tumpak na impormasyon tungkol sa mga tampok na nauugnay sa accessibility.

Ang pinapahintulutan namin

• Exemption ng host dahil sa kalusugan o kaligtasan para sa mga gabay na hayop: Kung hindi makakapagpatuloy ang host ng mga gabay na hayop dahil, halimbawa, maaaring magdulot ang hayop ng direktang banta sa kalusugan at kaligtasan ng permanenteng residente sa kanyang tuluyan, maaaring bigyan ng exemption ang host kung maagap niya kaming aabisuhan.
• Mga kahilingan na alisin ang mga gabay na hayop na hindi kontrolado ng kanilang amo: Kung hindi kontrolado ng bisita ang kanyang gabay na hayop, maaaring hilingin ng mga host na alisin ang hayop. Halimbawa, kung hindi babantayan ang hayop sa reserbasyon.

Ang hindi namin pinapahintulutan

• Pagtanggi sa reserbasyon dahil sa mga pangangailangan para sa accessibility ng bisita: Kung walang naaprubahang pagbubukod, hindi maaaring tanggihan, kanselahin, o baguhin sa iba pang paraan ng mga host ang reserbasyon nang dahil may gabay na hayop o pantulong na aparato ang bisita.
• Pagdaragdag ng mga bayarin dahil sa mga pangangailangan para sa accessibility ng bisita: Hindi maaaring maningil ang mga host ng karagdagang bayarin para sa mga gabay na hayop o pantulong na aparato. Sumangguni sa aming Patakaran sa Accessibility para maunawaan kung bakit naiiba ang mga gabay na hayop sa mga alagang hayop at hayop na nagbibigay ng emosyonal na suporta.
• Pagtanggi sa mga makatuwirang kahilingan ng mga bisita na paunlakan ang mga pangangailangan para sa accessibility: Dapat pagbigyan ng mga host ang mga kahilingan para sa makatuwirang pagpapaunlak para sa accessibility. Makatuwirang hilingin sa host na iusog ang kanyang sofa palayo sa pintuan para komportableng makapasok sa sala ang bisitang gumagamit ng wheelchair (kung may sapat na espasyo para iusog ang sofa at kaya ng host na iusog ang sofa). Gayunpaman, hindi makatuwirang hilingin sa host na palawakin ang pintuan ng kanyang tuluyan para magkasya ang wheelchair.
• Hindi patas na pakikitungo: Kung walang naaprubahang pagbubukod, pareho dapat ang paraan ng pakikitungo, paglalapat ng mga alituntunin, at ipinapamalas na pag-uugali ng mga host sa lahat ng bisita, anuman ang kanilang mga pangangailangan para sa accessibility.
• Mapanghamak na salita: Bisita man o host, walang nararapat na mahamak batay sa kanilang kapansanan—kabilang ang panghahamak sa serbisyong ibinibigay ng kanilang gabay na hayop o pantulong na aparato o ang paggamit ng iba pang mapandiskriminang salita.
• Pagsisinungaling tungkol sa mga accessibility feature: Naglalaman dapat ang mga listing ng tumpak na impormasyon tungkol sa mga available na accessibility feature sa tuluyan at kalapit na property. Tapat dapat ang mga host at kailangan nilang talakayin ang mga detalyeng nauugnay sa accessibility sa thread ng mensahe sa sinumang bisita na may mga natukoy na pangangailangan para sa accessibility.

Handa kaming tumulong

Kung may masaksihan o maranasan kang pag-uugali na labag sa aming mga patakaran, ipaalam ito sa amin.