Patakaran sa Paglabas sa Platform at Transparency sa Bayarin

Sa pagho‑host sa Airbnb, kinukumpirma mong susunod ka sa mga tuntunin at patakaran namin, maging sa aming Mga Tuntunin ng Serbisyo, na karapatan naming ipatupad sa sarili naming pagpapasya. Kung sakaling may paulit‑ulit o matinding paglabag, puwede kaming magsuspinde o permanenteng mag‑deactivate ng listing o account ng user. Para maprotektahan ang komunidad natin, ipinagbabawal namin ang mga sumusunod na gawain na nakalista sa ibaba.

Paglipat ng mga kasalukuyan, susunod, o umuulit na booking sa labas ng Airbnb

Kasama rito ang: 

• Pagpapalipat o paghikayat sa mga user na maglipat ng mga kasalukuyan, susunod, o umuulit na booking (kasama ang mga extension ng reserbasyon) sa labas ng Airbnb
• Paglalagay ng mga link sa listing o mensahe na maglalabas ng mga tao mula sa platform ng Airbnb
• Pag‑aalok o paghingi ng mga diskwento para mag‑book sa labas ng Airbnb
• Pagkansela ng kabuuan o bahagi ng kasalukuyang reserbasyon para mag‑book ulit sa labas ng Airbnb

Hindi paglalahad ng mga bayarin sa reserbasyon habang nagbu‑book pa lang ang bisita

Kasama rito ang:

• Hindi pagsasama ng anumang mandatoryong bayarin sa mga field ng pagpepresyo na ibinigay ng Airbnb o kung hindi man ay nagiging sanhi ng hindi tumpak na kabuuang presyo sa pag - check out
  • Ang mga mandatoryong bayarin ay mga gastos na dapat bayaran ng mga bisita dahil sa bilang ng mga gabing naka - book, bilang ng bisita, at bilang ng alagang hayop. Halimbawa ng mga mandatoryong bayarin ang mga bayarin sa utility, karagdagang bisita, alagang hayop, resort, pangangasiwa, destinasyon, homeowners association (HOA), at buwis (suriin ang exception sa ibaba).
  • Dapat ilahad sa naaangkop na patlang ang lahat ng mandatoryong bayarin o sa presyo kada gabi kung walang naaangkop na patlang para sa bayarin.
• Hindi paggamit sa tool ng Airbnb na “Baguhin ang reserbasyon” para tanggapin ang bayad para sa mga pagbabago sa bilang ng gabi, bisita, o alagang hayop
• Hindi paglalahad ng panseguridad na deposito. Hindi puwedeng maningil ng panseguridad na deposito ang karamihan sa mga host. Sa iilang pagkakataon kung kailan pinapayagan ang panseguridad na deposito, dapat itong ilahad sa naaangkop na patlang ng bayarin.
• Hindi paglalahad ng mga kinakailangang deposito para sa mga kaugnay na gastusin bilang bahagi ng mga karaniwang pamamaraan ng hotel. Dapat ihayag ang halaga ng deposito sa paglalarawan ng listing.

Pagbubukod

Sa mga lokasyon kung saan hindi nangongolekta ng buwis ang Airbnb o kung saan kinakailangan ng mga host na direkta itong kolektahin sa mga bisita ayon sa batas, dapat ilahad ng mga host sa paglalarawan ng listing ang mga buwis.

Pagbabayad ng anumang bayarin sa reserbasyon sa labas ng Airbnb

Ipinagbabawal ang paghiling, pagpapadala, o pagtanggap ng mga bayad sa labas ng Airbnb. Kasama rito ang gastos sa reserbasyon at mga bayarin kaugnay ng reserbasyon (hal., opsyonal na bayarin para painitin ang pool).

Mga exception

• Puwedeng mangolekta ng bayad ang ilang host na nakakonekta sa software para sa mga inilahad na mandatoryong bayarin at panseguridad na deposito sa labas ng platform ng Airbnb
• Puwedeng humiling ng deposito sa credit card o cash ang mga hotel sa panahon ng pag‑check in para sa mga kaugnay na bayaring bahagi ng mga karaniwan nilang pamamaraan
• Puwede ring maningil ang mga hotel sa labas ng platform ng Airbnb para sa mga opsyonal na bayarin (hal.: paradahan) kapag bahagi ito ng mga karaniwan nilang pamamaraan.
• Sa mga lokasyon kung saan hindi nangongolekta ng buwis ang Airbnb o kung saan kinakailangan ng mga host na direkta itong kolektahin sa mga bisita ayon sa batas, pinapayagan ang mga host na mangolekta ng mga nailahad na buwis sa labas ng Airbnb.

Paghingi o paggamit ng impormasyon sa pakikipag - ugnayan o pagkakakilanlan ng bisita sa mga paraang walang kaugnayan sa o nakakabawas sa kalidad ng pamamalagi nila

Kasama rito ang:

• Paghingi ng impormasyon sa pakikipag - ugnayan ng bisita bago mag - book. Sa Airbnb dapat ang lahat ng pakikipag - ugnayan sa bisita bago mag - book
• Paghingi ng email, mailing address, o iba pang paraan para makaugnayan ang bisita gamit ang sistema ng Airbnb sa pagpapadala ng mensahe bago mag - book
• Paghingi ng impormasyon sa pakikipag - ugnayan ng bisita pagkatapos mag - book para suriin ang credit o background
• Paghiling sa mga bisita na magpadala ng litrato ng pampamahalaang ID bago dumating maliban kung kinakailangan para makasunod sa batas o mga alituntunin ayon sa nakasaad sa ibaba
• Paggamit ng impormasyon sa pakikipag - ugnayan na ibinigay ng Airbnb para sa iba pang layuning lumalabag sa aming mga Tuntunin ng Serbisyo
  
• Pagbebenta, pagbabahagi, o paggamit ng impormasyon sa pakikipag - ugnayan ng bisita para sa marketing o pagbuo ng listahan ng contact

Mga exception

• Posibleng mangailangan ka ng karagdagang impormasyon sa pakikipag - ugnayan/pagkakakilanlan kung kinakailangan ito para makasunod sa batas o mga alituntunin (gaya ng mga lokal na batas, alituntunin ng HOA, panseguridad na alituntunin ng gusali). Puwedeng patunayan ng host ang pangangailangang ito sa pamamagitan ng pagsulat kapag hiniling ng Airbnb. Sa mga ganitong pagkakataon, dapat ilagay ng host sa paglalarawan ng listing ang impormasyon kung ano ang kinakailangan, at bakit ito kinakailangan, para maunawaan ng mga bisita na kinakailangan ang karagdagang hakbang na ito bago makapag - book. Responsibilidad ng mga host na siguraduhin ang pagsunod sa mga naaangkop na batas sa privacy ng datos
  
• Pagkatapos tumanggap ng booking, puwede mong ipakumpirma sa bisita na naaangkop na paraan ng pakikipag - ugnayan sa panahon ng biyahe ang impormasyon sa pakikipag - ugnayan na ibinigay ng Airbnb o kung gusto ng bisita ng ibang paraan ng pakikipag - ugnayan pagkatapos mag - book
  
• Puwede kayong makipag - ugnayan sa ibang paraan kung hihilingin ito ng bisita pagkatapos mag - book (hal.: chat app), pero dapat mong siguraduhing sumusunod sa iba pang rekisito ng patakarang ito ang naturang pakikipag - ugnayan

Pahingi ng feedback at mga review mula sa mga tao sa labas ng Airbnb

Hindi ka puwedeng humingi ng review mula sa mga bisita para sa pamamalagi sa Airbnb sa website na hindi Airbnb o magpasagot ng survey tungkol sa pamamalagi sa Airbnb sa website na hindi Airbnb (gaya ng form na wala sa Airbnb) maliban kung naaprubahan ka na partner na hotel. Naipagkakait ng mga aksyong ito sa komunidad ng Airbnb ang mahalagang impormasyon tungkol sa pamamalagi ng bisita. Gusto naming ibahagi ng mga bisita nang direkta sa Airbnb ang feedback nila para makatulong sa iba pang bisita ang mga saloobin nila.

Paghiling sa mga bisita na gumamit ng iba pang website o app para pisikal na mapasok ang listing

Kasama rito ang: 

• Paghiling sa mga bisita na gumawa ng hiwalay na account o magparehistro sa iba pang website bukod sa Airbnb.com para makapasok sa listing
  
• Paghiling sa mga bisita na mag - install ng third - party na app para makapasok sa listing. Mapapasok dapat ng bisita nang hindi nangangailangan ng ibang app o account ang lahat ng listing sa Airbnb
  

Mga exception

• Pinapayagan ang karagdagang pagpaparehistro o pag‑install ng mga karagdagang app kapag kinakailangan para makasunod sa batas o mga alituntunin (gaya ng mga lokal na batas, alituntunin ng HOA, panseguridad na alituntunin ng gusali). Puwedeng patunayan ng host ang pangangailangang ito sa pamamagitan ng pagsulat kapag hiniling ng Airbnb. Sa mga ganitong pagkakataon, dapat ilagay ng host sa paglalarawan ng listing ang impormasyon kung ano ang kinakailangan at bakit ito kinakailangan para maunawaan ng mga bisita na kinakailangan ang karagdagang hakbang na ito bago makapag‑book
  
• Mga app para makapasok nang walang susi at app na nakakatulong sa pamamalagi ng bisita (hal: Sonos, Nest, mga concierge app) basta opsyonal ang mga iyon