Pagandahin ang listing mo

Nagsisimula ang five‑star na pagho‑host sa pagtatakda ng malilinaw na dapat asahan sa page ng listing mo. Magugustuhan ng mga bisita kung nasa maayos na kalagayan ang patuluyan mo at katulad na katulad ito ng itinatampok sa mga litrato. Inaasahan din nilang madaling hanapin at gamitin ang lahat ng inilista mong amenidad.

Mababawasan ang posibilidad na magkamali ang inaasahan ng mga bisita sa patuluyan mo kung magbibigay ka ng mas maraming detalye. Mahahanap mo ang mga tool na kailangan mo para pahusayin ang mga detalye ng listing mo sa tab na Mga Listing.

Tulungan ang mga bisita na maintindihan ang layout ng patuluyan mo gamit ang photo tour na awtomatikong magsasaayos sa mga litrato ng listing ayon sa kuwarto.

Magsimula sa paglalagay ng mga napapanahong larawan ng bawat kuwarto at pinaghahatiang lugar.

• Gumamit ng mga litratong mataas ang kalidad. Kumuha ng mga landscape na litrato at tiyaking maliwanag ang lugar. I‑upload ang pinakamalaking file na puwede, na hindi bababa sa 1024 by 683 pixel. Subukang magpatulong sa propesyonal na photographer.
• Mag‑upload ng higit sa isang litrato ng bawat kuwarto. Gumamit ng magkakahalong wide‑angle, mid‑range, at close‑up na litrato. Magtampok ng mga kapaki‑pakinabang na detalye tulad ng universal na charger ng phone sa mesa sa tabi ng higaan o mga pantimpla ng kape at tsaa sa kusina.
• Itampok ang mga feature at amenidad. Maglagay ng mga litrato ng mga detalye ng tulugan, lugar sa labas, at anumang espesyal na feature para sa mga alagang hayop, pamilyang may kasamang mga bata, o nagtatrabaho nang malayuan.
• Isaad ang mga accessibility feature. Itampok kung paano mapapaginhawa ng patuluyan mo ang pamamalagi ng mga taong limitado ang pagkilos. Basahin ang gabay ng Airbnb sa pagkuha ng litrato ng mga accessibility feature.

Pagkatapos, sundin ang mga hakbang na ito para gumawa ng photo tour.

1. Piliin ang Gumawa ng photo tour. Sa pamamagitan ng iniangkop na AI engine ng Airbnb, madaliang maisasaayos ang mga litrato ng listing mo sa 19 na uri ng mga kuwarto at bahagi ng tuluyan. Mapupunta sa Mga karagdagang litrato ang mga litratong hindi nito matutukoy.

2. Suriin ang nagawang photo tour. Tiyaking naglagay ka ng kahit isang litrato man lang ng bawat kuwarto sa patuluyan mo. Puwede kang maglipat, magdagdag, o magtanggal ng litrato.

3. Maglagay ng malinaw na paglalarawan sa bawat litrato para ipaliwanag kung ano ang maaasahan sa kada kuwarto o bahagi ng tuluyan.

4. Para i‑preview kung paano itatampok ang mga litrato sa listing mo, pumunta sa Patuluyan mo at i‑tap ang button na Suriin.

“Maraming tao ang mas malamang na bumatay sa nakikita nila sa mga litrato kaysa sa paglalarawan ng listing,” sabi ni Sadie na Superhost sa Santa Fe, New Mexico.

Inaasahan ng mga bisita na tutugma ang mga tuluyan sa Airbnb sa mga paglalarawan ng listing. Tumpak na inilalarawan ng mga de‑kalidad na page ng listing kung ano ang puwedeng asahang makita, marinig, at maranasan ng mga bisita sa patuluyan mo habang namamalagi sila.

1. Tiyaking nagsasaad ng mga natatanging detalye tungkol sa patuluyan mo at sa paligid nito sa Pamagat ng listing. Halimbawa, isinasaad ng “Tahimik na studio malapit sa Uffizi” na nasa apartment sa kalagitnaan ng Florence, Italy ang tuluyan sa ilang salita lang.

2. Sa Paglalarawan ng listing, ipaalam sa mga bisita ang karanasan ng pamamalagi sa patuluyan mo. Magbigay ng kapaki‑pakinabang na impormasyon tungkol sa lokasyon, dekorasyon, at hospitalidad na iniaalok mo. Halimbawa, puwede mong ipaliwanag na may magandang tanawin ng canyon mula sa veranda sa paglubog ng araw o nasa itaas ng kapihang abala tuwing 6:00 AM hanggang 10:00 PM ang patuluyan mo.

3. Sa Property mo, magbigay ng pangkalahatang paglalarawan ng mga kuwarto at bahagi ng tuluyan. Gamitin ang seksyong ito para isaad ang mga praktikal na detalyeng maaaring pinag‑iisipan na ng mga bisita. Halimbawa, isaad na ganap na nababakuran ang likod‑bahay at sapat ang lawak nito para makapaglaro ang mga bata at alagang hayop.

4. Sa Pagbabahagi ng lokasyon, puwede ka ring magtakda ng partikular na lokasyon ng property mo para matulungan ang mga bisita na mawari ang lugar. Kung hindi naman, tinatayang lokasyon lang ang makikita nila hangga't hindi pa sila nagbu‑book.

Pinakamainam ang mga malinaw at prangkang paglalarawan. Maaaring makadismaya at maging dahilan ng hindi magagandang review kapag sobra‑sobra at hindi na makatotohanan ang iniaalok mo.

Mas pinapadali pa kaysa dati ng pang‑edit ng listing ang pagdaragdag ng mga amenidad.

1. Sa Mga amenidad, i‑tap ang plus sign (+). Makakapili ka sa halos 150 amenidad ayon sa kategorya o alpabeto o puwede kang maghanap ng pangalan ng amenidad.

2. Piliin ang plus sign sa tabi ng anumang feature na mayroon sa patuluyan mo.

3. I‑tap ang button na Suriin para masuri kung paano itatampok sa mga bisita ang mga pag‑edit sa page ng listing mo.

Mahalagang isaad ang lahat ng amenidad sa patuluyan mo at panatilihing gumagana nang maayos ang lahat ng iyon. Puwedeng gumamit ng filter ang mga bisita para hanapin ang mga patok na feature at amenidad tulad ng air conditioning, libreng paradahan, at washer o dryer.

Posibleng nagbago ang impormasyong nakasaad sa artikulong ito mula noong na‑publish ito.