Pagtatakda ng mga dapat asahan sa pamamagitan ng tumpak na lokasyon

Puwedeng malaki ang maging epekto ng lokasyon ng listing sa pagpapasya ng mga bisita kung magpapareserba sila. Kapag nag-book na ang mga bisita, kailangan nila ang eksaktong lokasyon mo para sa walang aberyang pag-check in.

Mahalagang tumpak na lokasyon ang ilalagay mo sa iyong listing sa Airbnb. Maganda ring magsaad ng katulad na impormasyon sa paglalarawan ng listing mo. “Sa paglalarawan, idinedetalye ko kung nasaan ang patuluyan,” sabi ni Juliette na miyembro ng Host Advisory Board sa Nairobi, Kenya.

Makakagawa ka lang ng mga pagbabago sa iyong address hanggang bago ka tumanggap ng booking sa unang pagkakataon. Pagkatapos noon, kailangan mo nang humingi ng tulong sa Suporta sa Komunidad.

Walang detalyeng labis sa pagsisigurong makakarating ang mga bisita sa iyong patuluyan bago ang pag-check in. Ibinibigay ni Juliette sa mga bisita ang mga GPS coordinate ng patuluyan niya. Sabi niya, nagbabahagi rin siya ng mga eksaktong detalye, gaya ng kulay ng gate at kung ano ang nakasulat doon.

Handa ring tumulong si Juliette sa panahon ng pag-check in sakaling mahirapan ang mga bisita sa pagtunton sa tuluyan. “Alam nila ang impormasyon sa pakikipag-ugnayan namin kaya karaniwan silang tumatawag sa amin kung may anumang isyu,” sabi niya.

Puwede kang magdagdag pa ng impormasyon sa paglalarawan ng listing mo, gaya ng mga detalye tungkol sa kapitbahayan at paradahan. Sa pamamagitan nito at ng mapa, malalaman ng mga bisita ang mga dapat nilang asahan at magiging mas komportable sila sa desisyon nilang mag-book.

Puwede mong piliin kung paano lalabas ang iyong lokasyon sa mga resulta ng paghahanap sa Airbnb:

• Tinatayang lokasyon: Ipinapakita sa mapa ng iyong listing ang lugar sa paligid nito ayon sa radius na humigit-kumulang kalahating milya (wala pang 1 km) mula sa mismong address.
• Eksaktong lokasyon: May pin sa pinakamalapit na pangunahing kalsada sa mapa pero hindi minamarkahan ang mismong patuluyan. Puwede mong i-drag ang mapa hanggang tumapat ang pin sa tamang lokasyon.

Hindi malalaman ng mga bisita ang mismong address mo hangga't hindi nakukumpirma ang kanyang reserbasyon. Tinatayang lokasyon ang default na setting.

Kung nahihirapan ang mga bisita na matunton ang iyong patuluyan, pag-isipang ilagay ang numero ng tuluyan sa pinto sa harap o magkabit ng mas maliwanag na ilaw para sa driveway.

Kailangan mo minsang maging madiskarte. “Mahirap matunton ang mga bahay na putik namin,” sabi ni Keshav na miyembro ng Host Advisory Board sa New Delhi, India. “Medyo iba ang estruktura ng kalye. Talagang kailangang may maghatid sa iyo para makarating ka roon.”

Gumagawa ng paraan si Keshav para mapadali ang pag-check in ng mga bisita nang walang tulong. “Iniisip namin kung paano kami makakapaglagay sa pangunahing kalsada ng signage, gaya ng maliit pero permanenteng karatula,” sabi niya.

Sa pamamagitan ng mga detalye ng iyong listing, kasama ang lokasyon nito, naitatakda ang mga dapat asahan ng mga bisita at nasasagot ang mga tanong nila kung natutugunan ng iyong patuluyan ang mga pangangailangan nila. Puwede nitong mabigyan ang mga bisita ng higit na kumpiyansa sa pagbu-book at matulungan kang maiwasang makatanggap ng mga negatibong review.

Halimbawa, maaaring gusto ng mga bisita na tantiyahin ang distansya sa pinakamalapit na sakayan o babaan o kumpirmahing nasa tabing-dagat talaga ang iyong property. Maaaring maging mas nakakaengganyo ang iyong patuluyan kapag pinili mong maglagay ng eksaktong lokasyon sa mga resulta ng paghahanap.

Mababawasan naman ang mga alalahanin mo sa privacy at seguridad kapag patuloy kang gumamit ng tinatayang lokasyon. Maaaring mas mapanatag ang isip ninyo ng mga bisita kapag pinili mong ilagay sa mga resulta ng paghahanap ang lugar sa paligid ng iyong patuluyan.