Sulitin ang tab na Mga Mensahe

Ang tab na Mga Mensahe ang inbox mo sa Airbnb. Sa pamamagitan nito, nasa iisang lugar na ang mga mensahe mo tungkol sa pagho‑host, pagbiyahe, at suporta. Sa pamamagitan ng mga feature sa tab na Mga Mensahe, magagawa mong:

• I‑filter ang mga mensahe at maghanap sa inbox mo.
• Magpadala at mag‑iskedyul ng mga mensahe, kabilang ang mga inihandang template na tinatawag na mga mabilisang tugon.
• Makipag‑ugnayan sa lahat ng bisita sa reserbasyon sa iisang pag‑uusap.
• Simulan ang mga naka‑thread na tugon para mapanatiling organisado ang mga pag‑uusap.
• I‑edit at bawiin ang mga mensaheng ipinadala.
• Gamitin ang palatandaang nabasa na para malaman kapag nabasa na ng mga bisita ang mga mensahe mo.
• Tumugon sa mga mensahe gamit ang mga emoji.

Sa default na view, nakalista ang lahat ng mensahe mo sa Airbnb. Piliin ang Pagho‑host, Pagbiyahe, o Suporta para i‑filter ang mga mensahe ayon sa uri.

Sa Pagho‑host, magagamit mo ang mga karagdagang filter na ito:

• Hindi pa nababasa: mga hindi pa nabubuksang mensahe ang ililista.
• Yugto ng reserbasyon: isinasaayos ang mga mensahe ayon sa mga kahilingan sa pagpapareserba, nalalapit na reserbasyon, kasalukuyang hino‑host, o nakalipas na reserbasyon.
• Mga listing: isinasaayos ang mga mensahe ayon sa listing kung mahigit sa isa ang listing mo.
• May star: inililista lang ang mga mensaheng minarkahan mo ng star.

Kung may co‑host ka, Superhost Ambassador ka, o nagho‑host ka ng Karanasan sa Airbnb, mapapansin mo sa tab na Mga Mensahe ang mga filter na ito:

• Co‑host: inililista ang mga pag‑uusap ninyo ng sinumang co‑host sa isang listing.
• Superhost Ambassador: inililista ang mga mensahe sa pagitan ninyo ng mga host na itinugma sa iyo.
• Mga Karanasan: mababasa mo rito ang mga mensaheng nauugnay sa mga booking ng Karanasan.

Ilapat ang filter na Pagbiyahe para basahin ang mga mensaheng ipinapadala at natatanggap mo bilang bisita. Gamitin ang filter na Suporta para basahin ang mga pag‑uusap mo sa Airbnb Support.

May hinahanap ka bang partikular na pag‑uusap? Puwede kang maghanap sa mga mensahe gamit ang mga pangalan, salita, o parirala. Isasaalang‑alang sa mga resulta ang anumang inilapat mong filter para mas mabilis mong matunton ang hinahanap mong pag‑uusap.

Mahalagang bahagi ng matagumpay na pagho‑host ang malinaw at napapanahong pakikipag‑ugnayan. Magsimula ng mga pag‑uusap, magbigay ng impormasyon, at sagutin ang mga tanong ng mga bisita sa tab na Mga Mensahe.

Para makatipid ng oras, subukang gamitin ang feature na mga mabilisang tugon. Tumutukoy ang mga mabilisang tugon sa mga template ng mensahe para sa pagbabahagi ng karaniwang impormasyon, kaya hindi mo na kailangang magsimula mula sa umpisa. Makakahanap ka ng ilang inihandang template sa tab na Mga Mensahe para suportahan ang mga bisita sa mahahalagang sandali, tulad ng pagkatapos mismo ng pagbu‑book. Puwede mong gamitin ang mga mabilisang tugon na ito, i‑edit ang mga ito, o gumawa ng mga iniangkop na template. 

Gumagamit ng AI ang tab na Mga Mensahe para intindihin ang mga tanong ng bisita at awtomatikong magmungkahi ng mabilisang tugon bilang sagot. Lalabas ang iminumungkahing tugon sa pag‑uusap ninyo ng bisita at ikaw lang ang makakabasa niyon.

Maaari mong suriin, i‑edit, at ipadala kaagad ang iminumungkahing mabilisang tugon o puwede kang mag‑iskedyul na ipadala ito sa ibang pagkakataon. Awtomatikong naglalagay ang mga placeholder sa mga template ng ilang partikular na detalye ng booking at listing tulad ng lokasyon, pangalan ng bisita, at oras ng pag‑check in kapag ipinadala ang mensahe. Siguraduhing kumpleto at napapanahon ang listing mo dahil hindi maipapadala nang maayos ang mga mensaheng may mga placeholder na walang laman.

Kapag malapit na ang mensaheng naiskedyul mo, may lalabas na paalala sa pag‑uusap ninyo ng bisita. Isaayos o laktawan ang pagpapadala ng mensahe kung inuulit nito ang impormasyong naibahagi mo na.

Matuto pa tungkol sa paggamit ng mga mabilisang tugon para makatipid sa oras

Magsisimula ang bawat booking ng bagong pag‑uusap sa tab na Mga Mensahe. 

Puwedeng imbitahan ng nag‑book na bisita na sumali sa reserbasyon ang iba pang may sapat na gulang na kasama nilang bumiyahe. Idaragdag sa pag‑uusap ang mga bisitang tatanggap sa imbitasyon, at maipapadala mo ang mga mensahe sa buong grupo. Mababasa ng mga bisita ang lahat ng mensahe kahit huli na silang sumali, kaya hindi mo na kailangang umulit sa pagpapadala ng mensahe.

I‑tap ang button na Mga detalye para sa higit pang impormasyon tungkol sa reserbasyon at pag‑uusap, kabilang ang listahan ng lahat ng sumali. Piliin ang litrato ng isang bisita para pumunta sa profile niya at kilalanin pa ang iho‑host mong bisita.

Matatagpuan mo sa tab na Mga Mensahe ang higit pang feature para sa pangangasiwa ng mga pag‑uusap, kabilang ang naka‑thread na tugon, mga tool sa pag‑edit, palatandaang nabasa na, at mga emoji.

• Sa pamamagitan ng naka‑thread na tugon, makakapagsimula ka ng thread kapag tumugon ka sa mensahe. Maisasama sa orihinal na mensahe ang tugon mo.
• Mga tool sa pag‑edit: Makakapag‑edit ka ng mensahe sa loob ng 15 minuto pagkatapos itong ipadala, at puwede mong bawiin ang mensahe sa loob ng 24 na oras.
• Ipinapaalam ng palatandaang nabasa na kung nabasa na ba ng mga bisita o iba pang tatanggap ang mga mensahe mo, maliban na lang kung in‑off nila ang feature na ito sa kanilang mga setting ng account.
• Puwede mong gamitin ang mga emoji na nakangiting mukha, puso, thumbs up, pumapalakpak, o tumatawa para tumugon sa mga mensahe.

Posibleng nagbago ang impormasyong nakasaad sa artikulong ito mula noong na‑publish ito.