Pagtatakda ng mga layunin para mapahusay ang performance ng iyong listing

Hindi lang sa buwan ng Enero puwedeng magplanong palaguin ang iyong negosyo. Makakatulong sa pagtatagumpay sa buong taon ang regular na pagsuri sa iyong progreso at pagsasaayos ng iyong diskarte kapag kailangan.

Pinapadali ng mga tool sa pagho-host at sanggunian na subaybayan ang performance ng iyong listing, matutunan kung ano ang mabisa para sa iba pang host, at magtakda ng mga layunin para makamit ang mga gusto mong resulta.

Mahirap malaman kung ano ang mabisa nang hindi sinusukat ang iyong progreso. Para kumalap ng impormasyon, gamitin ang iyong dashboard sa pagho-host para:

• Suriin ang iyong mga booking at kita
• Magbasa ng feedback mula sa mga review ng bisita
• Pag-aralan ang mga kasalukuyang lokal na trend sa pagbibiyahe

Nagbibigay ang seksyong Mga Insight ng iyong dashboard sa pagho-host ng basic stats, kabilang ang iyong mga buwanang kita, mga gabing na-book, mga review ng bisita, at kabuuang rating. Narito rin ang hub ng Mga Oportunidad, na nagsasaad ng mga trend sa pagbibiyahe sa lugar ng listing mo, tulad ng mga uri ng tuluyan at amenidad na pinakamadalas hanapin ng mga bisita.

Sa pagsuri mo sa iyong stats, pag-isipan kung nalulubos ng iyong diskarte sa pagpepresyo at availability sa kalendaryo ang mga kasalukuyang trend sa pagbibiyahe at panahon ng mataas na demand sa iyong rehiyon. Puwede ka ring gumamit ng feedback mula sa iyong mga bisita.

“Pakinggan ang mga bisita,” payo ng Superhost na si Elaine mula sa Balearic Islands, Spain. “Marami kang matututunan sa kanila tungkol sa mga bagay na puwede pang mapahusay. Kapag gumawa ka ng mga pagpapahusay, makakapagtakda ka ng mas mainam na hanay ng presyo.”

Para suriin pa nang masinsinan ang iyong datos, subukang i-on ang aming mga propesyonal na tool para ma-access ang iyong dashboard ng performance. (Puwede mo itong i-off anumang oras sa iyong mga setting ng account.)

Sa pamamagitan ng mga propesyonal na tool na ito, magagawa mong subaybayan ang iyong performance—rate sa tagal ng pagpapatuloy, average na presyo kada gabi, pananaw ng bisita, at higit pa—sa iba't ibang listing sa nakalipas na taon. Puwede mo ring ihambing ang iyong mga sukatan sa mga katulad na listing para matukoy mo kung alin sa iyong mga diskarte sa pagho-host ang pinakamabisa.

Kapag natukoy mo na ang mga bagay na makakapagpahusay sa performance ng listing mo, maaaring gustuhin mong malaman kung paano gagawa ng mga pagbabago. Sa halip na magsimula sa umpisa, puwede mong gawing batayan ang mga karanasan ng iba pang matagumpay na host.

Dito sa Resource Center, makakahanap ka ng mga tip mula sa mga Superhost tungkol sa mga paksa tulad ng paggawa ng plano para sa negosyo at pagdaragdag ng mga amenidad nang may nakatakdang badyet. O kaya, suriin ang aming kumpletong gabay para mapahusay ang iyong pagho-host.

Puwede ka ring matuto mula sa iba pang host sa pamamagitan ng paghahanap ng mga post na nauugnay sa iyong mga pangangailangan sa Community Center. Halimbawa, kung tumutuklas ka ng iba't ibang paraan para mapangasiwaan ang pananalapi mo. Ibinahagi ng Superhost na si Ann mula sa New York City ang diskarte niya sa isang post sa komunidad na ito.

“Ang unang layunin ko ay ang pagkakaroon ng mas malaking average na kita kada araw kumpara sa gastusin kada araw,” ayon kay Ann. “Nagpapanatili ako ng spreadsheet na nagsasaad ng mga kabuuang halaga. Kumita ako sa nakalipas na dalawang taon, kaya gusto ko itong magpatuloy.”

Sunod na hakbang ang pagtatakda ng mga layunin mo para sa susunod na taon batay sa lahat ng impormasyong nakalap mo. Pag-isipan kung ano ang dapat isapriyoridad at kung anong mga pagkilos ang maaaring gawin para masimulan ang pagpapahusay mo.

Halimbawa, narito ang ilang karaniwang layunin at kung paano matupad ang mga ito:

1. Makakuha ng mas maraming booking at mas malaking kita
Maaaring kailangan ng ilang pagsubok para makapagtakda ng naaangkop na diskarte sa pagpepresyo. Para matupad ang iyong mga pinansyal na layunin habang naghihikayat ng mga bisita, pag-isipang magdagdag ng bayarin para sa alagang hayop o mag-alok ng diskuwento para sa mas matatagal na pamamalagi.

Malaking bagay na panatilihing updated ang iyong listing para magtagumpay sa pagho-host. Planuhin ang availability sa kalendaryo mo batay sa iyong pag-unawa sa mga lokal na trend sa pagbibiyahe para sa mga panahong pinakamataas, mataas, at mababa ang demand.

Inirerekomenda ng Superhost na si Andrew mula sa Berlin na maging mapagpasensya at tumuon sa kasiyahan ng bisita habang inaalam mo pa kung ano ang magiging mainam para sa iyo: “May ilang listing sa Airbnb na kadalasang puno buong taon, pero karaniwang kailangan ng isang buong taon para matutunan mo ang iyong mga gawi at makabuo ka ng reputasyon mula sa mga review.”

2. Makakuha ng mas magagandang review ng bisita
Gawing mas nakakahikayat ang paglalarawan ng listing mo sa pamamagitan ng malinaw na pagtatakda ng mga dapat asahan at pagtatampok ng mga amenidad na gusto ng mga bisita, tulad ng mabilis na wifi at kusinang may kumpletong kagamitan. Tiyaking maglagay ng magagandang litrato na talagang nagtatampok ng iyong patuluyan.

“Malaking bagay sa paghikayat ng pag-book ng listing ang unang ilang litrato,” ayon kay Andrew. “Kailangang malinaw ang mga larawan at agaw-atensyon ang mga kulay, at naka-crop ang litrato para makita nang maayos ang itinatampok kahit maliit ang format.”

Malaking bagay rin para sa mga bisita ang kalinisan: Posibleng makahikayat ng mga posibitong review ang napakalinis na tuluyan. Ibahagi ang ginagawa mo para linisin at i-sanitize ang iyong patuluyan upang mapanatag ang loob ng mga bisita.

3. Gawing simple ang iyong mga gawain sa pagho-host
Mapapadali ang pagho-host at pagtupad sa iyong mga layunin kung makakahanap ka ng mas mahuhusay na paraan para pangasiwaan ang mga bagay na ginagawa nang madalas. Subukang gumamit ng mga mabilisang tugon at nakaiskedyul na mensahe para i-automate ang iyong mga pakikipag-ugnayan sa mga bisita.

Kabilang sa iba pang diskarte sa pagtitipid ng oras ang pagpapasimple ng iyong proseso ng pag-check in, pagpapadali ng iyong mga gawain sa paglilinis, at paglilinaw ng iyong mga alituntunin sa tuluyan. “Hindi dapat maging parang isang nakakalitong legal na dokumento ang mga alituntunin sa tuluyan,” sabi ng Superhost na si J. Renato mula sa Rio de Janeiro. “Kung hindi, walang magbabasa nito.”

Anuman ang iyong mga layunin sa pagho-host, handa kaming tulungan kang makamit ang mga ito—at gawin itong pinakamatagumpay na taon para sa iyo.

Posibleng nagbago ang impormasyong nakasaad sa artikulong ito mula noong na-publish ito.