Pagharap sa krisis sa Ukraine nang may agarang suporta

Noong linggo pagkatapos ng pagsalakay ng Russia sa Ukraine, naramdaman ng performer at host na si Rafał ang epekto nito sa kanyang bayan ng Wroclaw na nasa timog-kanlurang Poland. Maraming nag-iwan ng kahon-kahong donasyong kagamitan sa labas ng isang sentrong pangkulturang Ukrainian sa kanyang kapitbahayan. Nakarinig siya ng mga taong nagsasalita ng Ukrainian sa kalye at mga tindahan.

Hindi nagtagal, tatlong pamilyang mula sa Ukraine ang magkakasunod na nag-book ng mga buwanang pamamalagi sa bahay na ini-list niya sa Airbnb. Hindi gustong singilin ni Rafał ang mga taong lumilikas dahil sa digmaan kaya nakipag-ugnayan siya sa customer service ng Airbnb. Noong nalaman niyang puwedeng magbigay ng subsidiya ang Airbnb.org para sa kanyang mga pagsisikap, nag-sign up siya.

Ayon sa UN Human Rights Council, halos 7 milyong tao ang lumikas mula sa Ukraine sa loob ng anim na buwan matapos ang pagsalakay sa naturang bansa noong Pebrero 2022. Milyon-milyong pamilya ang dumating sa iba't ibang lungsod sa Europe. Kaunti lang ang dala nilang gamit at hindi nila alam kung kailan sila makakauwi.

Bilang tugon sa krisis, nanawagan ang Airbnb.org sa mga nonprofit partner nito at sa pandaigdigang komunidad ng mga host: Matutulungan ba ninyo kaming mag-alok ng pansamantalang tuluyan sa hanggang 100,000 tao na lumilikas mula sa Ukraine?

Natugunan na ng Airbnb.org ang target na iyon sa tulong ng pandaigdigang komunidad ng mga host, mga nagbibigay ng donasyon sa Airbnb.org, at mga organisasyon sa pagkakawanggawa na direktang tumutulong sa mga apektadong tao.

Matagal nang Airbnb host ang ilang taong tumugon sa panawagan gaya ni Rafał. Nag-aalok sila ng mga matutuluyan nang may diskuwento sa pamamagitan ng Airbnb.org sa panahon ng krisis na ito. May ibang gaya ni Mary, isang Amerikanong data scientist na nakatira sa Berlin, na kabilang sa 40,000 bagong host na nagpasyang mag-alok sa mga bisitang refugee ng libre o may diskuwentong matutuluyan sa pamamagitan ng Airbnb.org.

Sinabi ni Rafał na ikinagulat ng lahat ng taong kilala niya sa Poland ang paglusob ng Ukraine. Pero namangha siya sa kung gaano kabilis tumugon ng kanyang mga kaibigan at kapitbahay sa pagdagsa ng mga taong lumilikas mula sa digmaan. Nag-donate ang mga tao ng pagkain sa istasyon ng tren ng Wroclaw at nagtipon ng mga supply para maihatid sa hangganan ng Ukraine.

Nagsimula siyang mag-organisa ng konsiyerto para makalikom ng pera kasama ang kanyang mga kasamahan, pero nais din niyang makahanap ng mas agarang paraan para makatulong. “Isa sa pinakamahirap na maranasan ang mawalan ng lugar na matutuluyan, lugar na matutulugan, o lugar na mababalikan,” sabi niya.

Patuloy na ini-list ni Rafał ang kanyang bahay sa pamamagitan ng Airbnb.org para makapagpatuloy ng mga bisitang nawalan ng tirahan dahil sa mga krisis. Tumulong din siyang isalin ang mga webinar ng Airbnb.org sa Polish.

Sa Berlin, na halos 215 milya (350 kilometro) ang layo sa hilagang-kanluran ng Wroclaw, sinubaybayan ni Mary ang mga balita sa pagsalakay sa Ukraine. Nang malaman niya ang panawagan ng Airbnb.org para sa pagkilos online, ni-list niya ang kanyang apartment nang walang bayad.

Nakipag-ugnayan ang kawani mula sa Organisasyon para sa Panunuluyan, Asylum, at Migration (ORAM), isa sa mga partner ng Airbnb.org. Tulad ng naiulat ng maraming pahayagan ng balita, nakaragdag ang damdaming kontra-LGBTQ+ sa Ukraine at sa ilang nakapaligid na bansa sa panganib na dulot sa LGBTQ + na nawalan ng tirahan sa panahon ng digmaang ito. Tinanong ng kinatawan ng ORAM si Mary kung puwedeng mamalagi ang dalawang transgender sa kanyang lugar.

Masaya si Mary na mag-host ng mga bisitang LGBTQ+. “Alam kong ligtas na lugar ang aking apartment para sa kanila,” sabi niya.

Nang makaalis na ang mga unang bisita ni Mary, dumating si Dima para mamalagi nang dalawang linggo. Nakatira si Dima, isang lalaking homosexual na nasa kanyang 20s, sa Kyiv nang simulan ng mga Russian na bombahin ang lungsod. Tinulungan ng lokal na organisasyong pinangalanang Safebow si Dima at ang kanyang pusang si Peach na magbiyahe mula Poland papuntang Berlin. Doon, tinulungan siya ng ORAM na makahanap ng matutuluyan at magparehistro para sa mga serbisyong panlipunan.

Matapos ang paglalakbay na puno ng mga hadlang, kaluwagan para kay Dima ang makarating sa apartment ni Mary. “Sobrang emosyonal ako noong mga unang araw na iyon,” sabi niya. “Hindi ko alam kung ano ang mas mahalaga para sa akin: ang makapunta sa ligtas na lugar o ang malaman lang na maraming sumusuporta sa akin.”

Nasa bakasyon si Mary noong unang linggo ng pamamalagi ni Dima. Nang makabalik siya sa Berlin, nagkasundo ang dalawa. Nagtagal sila ng ilang oras sa kanyang mesa sa kusina habang pinagsasaluhan ang mga pagkain at inuming beer. Nagkukumustahan pa rin sila pagkatapos niyang lumipat sa ibang apartment.

"Napakalaking tulong nito sa aking pagsisimula rito," sabi ni Dima.

Patuloy na nagmumuni-muni si Mary tungkol sa kung gaano kadali ang pagho-host para sa kanya. “Wala akong ginawang sadyang pambihira,” giit ni Mary. “Sinubukan ko lang. Medyo naabala lang siguro ako.”

Ikinumpara niya ito sa mga kuwentong ibinahagi ng kanyang mga bisita: “Iniisip kong kailangan kong harapin ang [mga bagay] sa banyagang lugar na hindi ko pinili, at nang malayo sa aking pamilya. Nakakamangha iyan. Mahirap iyon.”

Hindi inasahan ni Mary na makikipagkaibigan siya sa kanyang mga bisita, pero natutuwa siya sa diwa ng komunidad na nabuo.

“Sa maraming beses, hindi natin nalalaman ang mga resulta ng mga pagsisikap na ginagawa natin,” sabi niya. “Pero sa pamamagitan nito, puwede akong gumawa ng pagbabago sa buhay ng kahit man lang isang tao.”