Ang nagawang pagbabago ng Airbnb.org sa taong 2022

Sa taong 2022, nakapagtakda ng bagong rekord ang Airbnb.org. Sa pakikipagtulungan ng mga host at organisasyon sa pagkakawanggawa sa iba't ibang panig ng mundo, nabigyan ng nonprofit ng libreng pansamantalang tuluyan ang mahigit 140,000 tao. Mas marami iyon kaysa sa pinagsama-samang bilang ng mga taong natulungan sa nakaraang siyam na taon.

Nakatulong ang kabutihang-loob ng mga host at donor sa pagsuporta sa:

• Mga refugee na lumikas sa Ukraine pagkatapos ng pagsalakay ng Russia
• Mga refugee mula sa Afghanistan na dumating sa North America
• Mga pamilyang nawalan ng tirahan sa buong Latin America dahil sa kawalan ng kapanatagan sa pulitika at ekonomiya
• Mga komunidad sa U.S. na naapektuhan ng mga Bagyong Ian at Fiona

Ang Airbnb.org ay isang nonprofit na organisasyong pinapatakbo nang hindi saklaw ng Airbnb. Nagsimula ang inspirasyon para rito noong 2012, nang ipagamit ng isang host ang kanyang tuluyan sa mga taong naapektuhan ng Bagyong Sandy. Sa nakalipas na dekada, mas pinabuti ang gawain nito para makatulong sa pagbibigay ng mga matutuluyan sa mga taong lumikas, relief worker, refugee, asylum seeker, at frontline worker na lumalaban sa paglaganap ng COVID-19.

Pagkatapos ng pagsalakay ng Russia noong Pebrero 2022, mahigit 6 na milyong tao ang lumikas mula sa Ukraine para maging ligtas. Ito ang pinakamalaking paglikas ng mga refugee sa buong Europa mula noong Ikalawang Digmaang Pandaigdig.

Nakatuon ang Airbnb.org sa paghahanap ng pansamantalang tuluyan para sa 100,000 tao. Dumating ang mga donasyon mula sa 95 bansa, at libu-libong host ang nag-sign up para mag-alok nang libre o may diskuwentong tuluyan. Dahil sa pagbuhos ng suporta, nagsanib-puwersa ang Airbnb.org sa mga organisasyon sa iba't ibang panig ng Europe at North America para iugnay ang mga refugee sa mga lugar na matutuluyan.

Iba-iba ang epekto ng krisis sa mga populasyong dati nang nasa laylayan ng lipunan. Sa taong 2022, nagpatuloy ang Airbnb.org sa mga pagsisikap nito para paglingkuran ang mga komunidad na ito.

Halimbawa, nakipagtulungan ang Black Women for Black Lives at Global Empowerment Mission sa Airbnb.org para suportahan ang mga estudyanteng African na nag-aaral sa Ukraine. Hindi kinilala ng ilang ahensya ng gobyerno ang mga estudyanteng mula sa ibang bansa bilang mga refugee. Marami sa kanila ang nakakaranas ng rasismo kapag sinusubukan nilang umalis ng Ukraine at i-access ang mga mapagkukunan sa ibang bansa.

Isa pang partner ang Organization for Refuge, Asylum, and Migration (ORAM), na nakatuon sa mga LGBTQ+ na refugee mula sa Ukraine na nakaranas ng diskriminasyon. Sa Berlin, naiugnay ng ORAM si Dima, isang lalaking homosexual na mula sa Kiev, kay Mary na isang American sa Berlin na ini-list ang kanyang apartment sa pamamagitan ng Airbnb.org. Nagbigay si Mary ng ligtas na tuluyan para kay Dima nang dumating siya sa Germany (tulad ng inilarawan sa video na nasa itaas).

Maraming iba pang organisasyon sa pagkakawanggawa ang nag-alok ng mga matutuluyan sa Airbnb.org bilang bahagi ng kanilang gawain, kabilang ang:

• HIAS sa Ecuador na sinusuportahan ang mga taong tulad ni Daniela, na lumikas ang pamilya dahil sa mga nangyayaring karahasan sa Colombia. Inuugnay sila ng HIAS sa mga host na tulad ni Mery, na nakatira sa kapitbahayan ng Quito kung saan maraming refugee ang naninirahan. Nag-aalok ang HIAS ng pagsasanay kung paano mag-host ng mga taong nakaranas ng trauma. Nagbibigay rin sila ng suporta sa panahon ng kanilang pamamalagi.
• Community Sponsorship Hub, ang unang organisasyon sa U.S. na nakatuon lang sa pagpapalawak ng pag-sponsor ng komunidad sa mga refugee. Sa pamamagitan ng Programang Grupo ng Sponsor, nakipagtulungan ito sa mga kalapit na iba't ibang lungsod para salubungin ang mga bagong dating na Afghan at Ukrainian.
• Insight Ukraine, isang organisasyon para sa karapatang pantao ng LGBTQ+, na tumulong sa libu-libong tao na makaalis ng Ukraine at magkaroon ng access sa mga tuluyan, pangangalaga sa kalusugan ng pag-iisip, at doktor na ingklusibo sa LGBTQ+ para sa kanilang pagsisimulang muli.
• Münchner Freiwillige na nag-set up ng mga istasyon ng tulong para sa mga taong dumarating sa Munich mula sa Ukraine. Tinutulungan nito ang mga taong iyon na makakuha ng maraming iba't-ibang serbisyo, kabilang ang tuluyan.

Salamat sa mga host, donor, at partner na sumali sa pandaigdigang kilusang ito para iparamdam ang pagiging tanggap sa panahon ng krisis.