7 tip para sa pagho-host ng mga taong lumikas mula sa krisis

Kung nakapag-host ka na sa pamamagitan ng Airbnb dati, malamang na gumugol ka ng maraming oras sa pag-iisip kung paano maipaparamdam sa iyong mga bisita na tanggap sila sa iyong tuluyan.

Kapag nagho-host ka ng mga pang-emergency na pamamalagi sa pamamagitan ng Airbnb.org, maaaring pinag-iisipan mo rin kung paano patutuluyin ang mga bisitang maaaring nakakaranas ng trauma.

Maaaring mayroong ibang hanay ng mga alalahanin at inaasahan ang mga taong nilisan ang kanilang mga tahanan para sa kaligtasan, kung minsan nang may kaunting babala, kaysa sa mga biyaherong naglilibang. Isa iyon sa mga dahilan kung bakit nakikipag-partner ang Airbnb.org sa mga nonprofit na nagpapakadalubhasa sa suporta para sa mga taong nakakaranas ng kaguluhan at mga natural na kalamidad. Minsan, nagbibigay ang mga organisasyong ito ng mga komprehensibong serbisyo sa panahon ng pamamalagi ng iyong mga bisita.

Nag-aalok ang Airbnb.org ng espesyal na sinanay na customer support para sa iyo at sa iyong mga bisita kung magkaroon ng mga komplikadong isyu. Sinusuportahan din nito ang mga bisita anuman ang kanilang nasyonalidad, lahi, etnisidad, o inihahayag na pagkakakilanlan.

Mahirap tantiyahin kung gaano kahalaga ang komportable, ligtas, at pribadong espasyo para sa pamilyang dumanas ng mga traumatikong karanasan. Mula nang umalis sila sa kanilang mga tahanan, marami ang walang access sa kusina kung saan puwede silang magluto o sa sala kung saan puwede silang magtipon.

Narito ang ilang hakbang na puwede mong gawin para maging mas magiliw ang iyong tuluyan:

• Lumikha ng mainit na pagtanggap at kaginhawaan sa iyong tuluyan para matulungan ang mga taong makapagpahinga. Makakatulong ang malinis na sapin sa kama at mga tuwalya, mga pangunahing gamit sa banyo, at mga pangunahing kailangan sa kusina para maramdaman ng mga taong puwede silang mamalagi, kahit ilang araw lang.

• Maaaring nababahala ang ilang bisita tungkol sa kanilang personal na kaligtasan. Subukang tiyakin na naiilawan nang mabuti ang mga daanan ng sasakyan at mga pasukan. Tiyaking gumagana ang lahat ng kandado, blind, at kurtina. Ipagbigay-alam sa kanila kung dapat nilang asahan ang malalakas na ingay tulad ng mga eroplano na direktang lumilipad sa bubungan o mga kumokolekta ng basurang papalapit sa bahay sa umaga.

• Maaaring mahirapan ang mga taong nakakaranas ng trauma at pagbabago na makaalala ng impormasyon. "Hindi ka makapag-isip nang diretso; hindi ka makapagproseso," sabi ng bisitang inilikas nang magkaroon ng malaking sunog sa California. "Nakaka-overwhelm ito na dumating sa puntong hindi mo na rin nga alam ang gagawin, at halos naba-blangko ka." Puwedeng makatulong ang mga visual aid sa iyong mga bisita. Puwede kang mag-alok ng naka-print na address ng iyong listing at ng mapa ng kapitbahayan na makokonsulta ng iyong mga bisita kapag kailangan nila.

• Kung hindi pareho ang wikang ginagamit mo at ng iyong bisita, maghanap ng mga lokal na nonprofit o negosyo na maaaring makapag-alok ng mga sangguniang nakasalin sa wikang alam ng bisita. Kung may tumutulong sa iyong mga bisita na caseworker mula sa isa sa mga nonprofit partner ng Airbnb.org, maaari din silang makatulong.

Para sa maraming host, isa sa pinakamalaking reward ng pagho-host ang pagbuo ng mga personal na koneksiyon sa mga bisita. Narito ang ilang bagay na dapat tandaan kapag nakikipag-ugnayan ka sa mga bisitang maaaring nakaranas kamakailan ng trauma.

• Napakahalaga ng pagiging malinaw at hindi pagbabago-bago. Bigyan ng paunang abiso ang mga bisita kung may darating para sa pagmementena sa loob o paligid ng bahay. Bigyan din sila ng paunang abiso kung kakailanganin mong bumisita.

• Kapag nakipag-usap ka sa iyong mga bisita, subukang ituon ang mga pagtatanong tungkol sa kanilang pamamalagi sa halip na sa krisis na naranasan nila. Sinabi ni Maria na nag-host ng maraming taong lumilikas mula sa Ukraine, “Nagtanong ako ng malalawak na mga tanong tulad ng ‘Saan ka nanggagaling?’ at ‘Kumusta ang iyong paglalakbay?’” Ipapahiwatig sa iyo ng iyong mga bisita kung gusto nilang pag-usapan nang higit pa ang tungkol sa kanilang karanasan, dagdag pa niya. Sa paggalang sa kanilang privacy, binibigyan mo sila ng espasyo para makapagpahinga at mapanumbalik ang lakas.

• Pansinin ang mga pahiwatig mula sa iyong mga bisita tungkol sa kung paano nila gustong makipag-ugnayan sa iyo. Maaaring gustuhin ng ilan na manatiling malapit sa kanilang mga pamilya. Maaaring makipag-ugnayan ang iba at humiling sa iyo na tulungan silang bumuo ng mga koneksiyon sa komunidad.

Salamat sa pagpayag mong ialok ang iyong tuluyan, oras, at kabaitan. Kung gusto mo ng higit pang impormasyon kung paano makapaghahanda para sa mga pang-emergency na pamamalagi, makakahanap ka ng mga artikulo at video sa gabay sa pagho-host ng Airbnb.org na nasa Resource Center.