Kilalanin ang mga host sa Florida na nagpatuloy ng mga lumikas dahil sa bagyo

Airbnb.org na ngayon ang Open Homes

Airbnb.org na ngayon ang programang Open Homes ng Airbnb. Isa itong bagong 501(c)(3) nonprofit. Nagpapasalamat kami sa pakikiisa mo sa amin para mabuo ang komunidad ng Open Homes. Nasasabik kaming makasama ka sa bagong kabanatang ito.

Noong nagkahiwalay sina Jason at Karen sa kasagsagan ng Bagyong Michael, tinulungan sila ng mga host sa Open Homes na sina Bob at Juan na muling magkasama-sama ang pamilya nila.

Noong Oktubre 2018, pagkatapos maging Category 5 ang bagyo sa Florida Panhandle, lumikas patungong Orlando sina Jason, Karen, at ang kanilang mga anak.

“Bilang mga taga-Florida, medyo matigas ang ulo namin pagdating sa bagyo,” sabi ni Jason na nakatira kasama ang pamilya niya sa Fort Walton Beach na tatlong milya ang layo sa baybayin. “Hindi namin pinapansin ang mga iyon maliban na lang kung Category 3 o Category 4 ang lakas ng mga iyon. Pero noong umabot sa Category 5 ang lakas nito, hindi na kami nag-atubili pa. Nagpasya kaming umalis.”

“Dalawang araw nilang isinara ang mga paaralan at hindi iyon pangkaraniwan,” sabi ni Karen na nagtuturo ng teatro sa isang lokal na high school. “Napagtanto namin noon na malala ang sitwasyon. At gusto naming sama-sama kami sakaling may mangyaring napakalubha.”

Tumama ang Bagyong Michael sa gitnang Florida nang may dalang hangin na 150 milya kada oras. Natangay ang mga bubong, binaha ng tubig-dagat ang mga highway, tumumba ang mga poste ng kuryente, at nalagay sa panganib ang maraming lugar. Noong panahong iyon, nasa business trip si Jason at 10 oras ang layo niya sa pamilya niya habang nasa bahay si Karen kasama ang dalawang anak nila. Mabilis na napagtanto ng pamilya na puno na ang mga shelter sa malapit at masyadong mahal ang mga hotel.

“Tiningnan ko ang mga hotel app ko at nakita kong mabilis na nabu-book ang mga iyon, at pataas nang pataas ang mga presyo, kaya binuksan ko ang Airbnb app ko,” sabi ni Jason. “Talagang bahagi na ng plano sa paglikas namin ngayon na maghanap ng Airbnb bago maghanap ng hotel. Sa pagtama ng bagyo, hindi magandang maipit ka sa daan sa pagtatangka mong lumikas. Kapag mas matagal kang naghintay, mas maraming tao kang makakasabay lumikas.”

Binuksan niya ang Airbnb app sa phone niya, at may notipikasyong nagtanong kung naapektuhan siya o ang pamilya niya ng bagyo. Doon niya natuklasan ang Open Homes, isang programang nag-uugnay ng mga taong naapektuhan ng sakuna sa mga libreng lugar na matutuluyan. Nakahanap siya ng bahay na may tatlong kuwarto at tatlong banyo. Mapupuntahan iyon gamit ang sasakyan at nasa lokasyon na mainam na maging kitaan ng pamilya nila.

Nagkita sina Jason at Karen sa kanilang Airbnb sa gitnang Florida sa timog mismo ng Orlando, isang lugar na dinarayo ng mga tao dahil malapit ito sa Disney World. May nakakarelaks na disenyong pantabing-dagat ang patuluyan na may mga kulay hiyas na muwebles at matitingkad na pader.

Unang inalok ng mag-asawang sina Bob at Juan ang patuluyan nila sa pamamagitan ng programa noong 2016, at nakapagpatuloy na sila mula noon ng maraming pamilyang naapektuhan ng Bagyong Irma at Bagyong Michael. Pitong taon na silang mag-asawa at mahigit isang dekada na silang magkarelasyon. Nagretiro na si Bob at siya ang nangangasiwa sa mga property nila, at naglunsad kamakailan si Juan ng negosyo sa pagbiyahe para sa pagpunta sa Ecuador na para sa mga LGBT. Sa kasalukuyan nakapag-host na sila ng mahigit 2,000 tao mula sa mahigit 35 bansa.

“Pagkarating namin doon, naramdaman naming parang tahanan na rin namin iyon,” sabi ni Karen. “Siyempre, inaalala namin noon ang bahay namin, pero nakakagaan ng pakiramdam na mabawasan ang nararanasan naming stress. Nagulat at natuwa kami sa pool.”

Sa loob ng tatlong gabi, nagpahinga ang pamilya, muling nagtipon, at binantayan ang balita habang kasagsagan ng bagyo. “Sa nakakabahalang sitwasyon, naramdaman naming inalagaan kami,” sabi ni Jason. “Nakakagulat na sa pamamagitan ng app iyon nangyari.”

Kahit nasa Fort Lauderdale noon sina Bob at Juan, nakatulong pa rin sila kahit malayo sila. Nakikipag-usap si Juan kay Jason at madalas niyang kinukumusta ang pamilya ni Jason. “Ramdam mo pa ring responsable ka dahil may mga bisita ka sa bahay,” sabi ni Bob, “Kahit na lumilikas sila sa mas malalang kalagayan, iniisip mo pa ring: Wala sanang masamang mangyari sa kanila.”

Kadalasang pinaghahandaan nina Jason at Karen ang panahon ng bagyo sa pamamagitan ng pag-iimbak ng di-nasisirang pagkain at pagpuno sa kanilang bathtub ng yelo at ekstrang tubig. “Kung maghihintay ka hanggang sa mismong araw at sasabayan mong mamili ang mga tao, wala ka nang maaabutan,” sabi ni Karen. “Nagtatabi kami ng mga baterya, flashlight, at charger na may bateryang pinapatakbo ng hand-crank para sa mga telepono namin kung sakaling mawalan ng kuryente.”

Naghanda sina Juan at Bob na i-host ang pamilya nina Jason at Karen gaya ng ginagawa nila para sa iba pang bisita sa Airbnb. “Kapag bumibiyahe tayo, gusto nating lahat na makahanap ng matutuluyan kung saan komportable tayo,” sabi ni Juan nang binibigyang-diin na hindi naiiba ang sitwasyong ito. “Isang malinis at ligtas na lugar kung saan tanggap ka.”

Pagkabalik nina Jason at Karen sa bahay nila noong linggong iyon, wala silang napansing matinding pinsala, pero maraming tao sa kanilang komunidad ang hindi ganoon kapalad. “Aabutin nang maraming taon para makabawi at muling makabangon,” sabi ni Jason. “Hindi na ibinabalita ito, pero may mga tao pa ring wasak ang mga bahay at naninirahan sa mga tent city sa lungsod ng Panama.” Hindi bababa sa 36 na katao ang namatay sa kasagsagan ng Bagyong Michael, ang pinakamapaminsalang bagyo sa rehiyon simula 1992.

“Masayang tumulong sa ibang tao nang walang inaasahang kapalit,” sabi ni Juan. “Ilang beses nag-alok si Jason na magbayad at sinabi namin sa kanya: Hindi na kailangan. Alam naming nawalan ka ng tirahan at ikinalulugod naming tumulong.”

“Kung kami ang nasa sitwasyon niya at may parating na bagyo,” sabi niya, “mapapanatag kaming malaman na malalapitan namin ang Open Homes.”

Posibleng nagbago ang impormasyong nakasaad sa artikulong ito mula noong na‑publish ito.