Bakit mahalaga ang mga review

Nakakatulong ang mga review at rating para makapagdesisyon ang mga bisita kung angkop ba sa kanila ang patuluyan mo. Puwedeng dumami ang mga booking at lumaki ang kita kapag mas maganda ang mga review at rating.

Pagkatapos mag‑check out, may 14 na araw ka at ang bisitang nag‑book ng pamamalagi para magbigay ng review sa isa’t isa. Ipo‑post ang mga review kapag nakapagsumite na kayo pareho ng mga review o kapag natapos na ang 14 na araw na palugit sa pagbibigay ng review, alinman ang mauna.

Puwedeng magbahagi ang mga bisita ng feedback sa:

• Pampublikong review. Lalabas ang review nila sa listing at profile mo. Kung tutugon ka sa isang pampublikong review, lalabas ang tugon mo sa ibaba niyon.
• Note para sa host. Kayo lang ng Airbnb ang makakakita sa note. Katulad ng mga review, makakatulong sa Airbnb ang mga note na mapahusay ang mga resulta ng paghahanap at matukoy ang mga patuluyang gusto ng mga bisita.

Awtomatikong mauuna ang mga may kaugnayang review. Puwede ring maghanap ang mga bisita ng mga review na maisasaayos ayon sa pinakabago, may pinakamataas na rating, o may pinakamababang rating.

Ituring ang feedback ng mga bisita bilang pagkakataong mapahusay ang iniaalok mo. Basahin ang bawat review, at tumugon nang maayos para maiparating na sineseryoso mo ang feedback na iyon.

Hinihiling sa mga bisita na bigyan ng rating ang buong karanasan nila at ang anim na kategorya gamit ang rating na 1 star hanggang 5 star. Hindi average ng iba pang kategorya ang kabuuang karanasan.

Narito ang mga kategorya:

• Pag‑check in. Gaano kadaling mahanap at makapasok sa patuluyan?
• Kalinisan. Gaano kabuti nilinis ang patuluyan bago dumating ang bisita?
• Katumpakan. Natugunan ba ng patuluyan ang mga inaasahan ng bisita batay sa listing?
• Pakikipag‑ugnayan. Gaano kaayos na nakipag‑ugnayan ang host simula sa pagbu‑book hanggang sa pag‑check out?
• Lokasyon. Kumusta ang lugar at kapitbahayan para sa bisita?
• Pagiging sulit. Gaano kasulit ang patuluyan para sa presyo nito?

Lalabas ang kabuuang star rating ng bawat bisita sa tabi ng review nila. Pagkatapos mabigyan ng rating ng tatlong bisita ang listing mo, lalabas ang average na kabuuang star rating sa mga resulta ng paghahanap at sa listing mo.

Nakakatulong sa Airbnb ang mga rating na matukoy at makilala ang mga nangungunang host at listing, kabilang ang programang Superhost at mga Paborito ng bisita. 

Kinikilala ang mga Superhost dahil sa bukod‑tanging hospitalidad nila. Dapat mapanatili ng mga Superhost ang average na kabuuang rating na hindi bababa sa 4.8 stars at matugunan ang iba pang pamantayan. 

Sa pagbibigay ng review sa mga bisita, maipapaalala mo sa kanila na bigyan ka rin ng review. Lalabas ang mga review mo sa mga page ng profile ng bisitang nag‑book at mga bisitang tinanggap ang mga imbitasyon sa reserbasyong iyon. Sikaping:

• Ipabatid ang pasasalamat. Puwedeng simple lang ito, gaya ng: “Salamat sa pagbisita!”
• Mag‑alok ng mga detalye. Puwede kang sumulat ng: “Sinunod ng bisitang ito ang lahat ng tagubilin sa pag‑check out.”
• Maging magalang. Pag‑isipang tugunan ang mga sensitibong isyu sa direktang mensahe.

Hihilingin sa iyo na magbigay ng rating sa mga bisita para sa kalinisan, pakikipag‑ugnayan, at pagsunod nila sa mga alituntunin sa tuluyan mo. Makakatulong ang feedback mo na maipatupad ang mga pangunahing alituntunin para sa mga bisita na nag‑aatas sa mga bisita na itrato ang patuluyan mo na parang sarili nilang tahanan at sundin ang mga alituntunin sa tuluyan mo.

Posibleng nagbago na ang impormasyong nakasaad sa artikulong ito mula noong na‑publish ito.