Mga simpleng paraan para mapasaya ang mga bisita sa mas matatagal na pamamalagi
Kadalasang iba ang mga pangangailangan ng mga bisitang mamamalagi sa patuluyan mo nang 28 gabi o mas matagal pa kumpara sa mga panandaliang bisita. Sa pamamagitan ng pagtugon sa mga pangangailangang iyon, mapapaganda mo ang mga karanasan nila sa biyahe at puwede ka ring makatanggap ng higit pang five-star na review.
Para mapasaya ang mga buwanang bisita mo, subukan ang mga simpleng gawain na ito humigit-kumulang isang linggo pagkarating nila.
Pagtatanong sa mga bisita kung ano ang kailangan nila
Masyadong matagal ang isang buwan para hindi mo magamit ang regular na ginagamit mo sa bahay na hindi mo puwedeng dalhin. Bilang host, puwede mong itanong sa mga bisita kung may kulang silang pangunahing kailangan.
Posibleng maghanap sila ng dagdag na unan o kumot, payong, o gamit sa kusina, gaya ng toaster o blender. Posibleng malaki ang maitulong sa kanila ng kahandaan mong ibigay ang mga simpleng bagay na ito, at maipapagamit mo rin ang mga ito sa iba pang magiging bisita mo.
Ayon kay Andrea na isang Superhost sa Leavenworth, Washington, palagi niyang kinukumpleto ang mga pangunahing kailangan sa kusina para sa mas matatagal na pamamalagi. “Palagi kong binibigyan ang mga bisita ko ng maraming dahon ng tsaa, kape, iba't ibang pantimpla ng kape, mantika, at pampalasa.”
Pag-aalok ng paglilinis sa panahon ng pamamalagi
Maraming bisita ang natutuwa sa ideya ng libreng paglilinis sa panahon ng pamamalagi nila. Nakakatulong iyon sa kanila at pagkakataon iyon para makapagsagawa ka ng simpleng pagmementena, gaya ng pagpapalit ng mga baterya, bumbilya, at filter.
Ganito ang madalas sabihin ni Annette na isang Superhost sa San Francisco sa mga bisita niya: “Dahil mamamalagi kayo rito nang isang buwan o mas matagal pa, posibleng may kailanganin kaming aksyunan. Huwag subukang kayo mismo ang magkumpuni, gaano man iyon kasimple. Ipaalam iyon sa amin kaagad at aasikasuhin namin iyon.”
Kapag mag-iiskedyul ng paglilinis sa panahon ng pamamalagi, magandang ipaalam sa mga bisita kung sino mismo ang papasok sa tuluyan, kung anong oras siya magsisimula, at kung gaano katagal siya malamang na mananatili roon. Sa pamamagitan ng pagtatakda ng malilinaw na dapat asahan, maipaparating mo na iginagalang mo ang privacy at kaligtasan nila.
Puwede ka ring mag-alok ng mas madalas na serbisyo nang may bayad na makakatulong sa mga tagalinis mo at sa pagpapanatili sa kalinisan ng patuluyan mo.
Pagrerekomenda ng mga lokal na serbisyo
Karaniwang hindi pamilyar sa lugar ang mga bisita, hindi gaya mo. Baka sakaling mas masulit nila ang pagbisita nila kapag binigyan mo sila ng mga tip ng lokal sa mensahe o sa guidebook.
Gumawa ng maikling listahan nang iniisip ang mga serbisyong posibleng kailanganin ng mga bisitang mamamalagi nang matagal, gaya ng paglilibot ng aso, paghahatid ng grocery, o pag-aayos ng laptop. Sa pamamagitan ng pagrerekomenda ng mga lokal na negosyo, mabibigyan mo ng koneksyon sa lugar ang mga bisita habang sinusuportahan mo ang iyong komunidad.
Ipaalam sa mga bisita ang mga paborito mong lugar, lalo na ang mga lugar na hindi masyadong kilala na hindi nila dapat mapalampas. Huwag kalimutang banggitin ang mga pagdiriwang o iba pang malaking pampublikong event na mangyayari sa panahon ng pamamalagi nila.
Pagdaragdag ng mga espesyal na detalye
Karaniwang nararamdaman ng mga bisita na pinapahalagahan sila dahil sa mga espesyal na detalye. Puwede kang maglagay ng card sa pinto na naglalaman ng simpleng pasasalamat (“Salamat sa pamamalagi sa patuluyan namin”) at nakakatuwang regalo:
- Bote ng wine mula sa rehiyon
- Bagong lutong tinapay
- Souvenir mula sa lugar
“Mas mainam kapag mas maliit at mas magaan iyon,” sabi ni Donna na isang Superhost sa San Francisco. “Mas gusto kong nagbibigay ng makakain para magamit nila iyon kaagad kung gusto nila.” Puwedeng mapasaya ang mga bisita ng mga lokal na produkto sa sandaling iyon at kapag naalala nila ang pamamalagi nila sa patuluyan mo pagkatapos nilang mag-check out.