Ihanda ang tuluyan mo para sa mga bisita

Ihanda ang patuluyan mo at pagtuunan ang pagbibigay ng ginhawa, kalinisan, at kaayusan. Ikinatutuwa ng mga bisita kapag may dating at kaaya-aya ang tuluyan na parang tunay na tahanan.

Magsimula sa paglalaan ng mga pangunahing kailangan: toilet paper, sabon, isang tuwalya at unan kada bisita, at mga linen para sa bawat higaan. Makakatulong na pag‑isipan ang mga bagay na posibleng kailanganin ng mga bisita sa panahon ng pamamalagi nila at suriin ang bawat kuwarto. Kasama sa mga pangunahing kuwarto ang:

• Kusina. Bukod sa mga kasangkapan sa pagluluto, mas madaling makakapaghanda ng pagkain at mas masisiyahan sa patuluyan mo ang mga bisita kapag may mga pangunahing kailangan tulad ng kape at tsaa, mga panimpla, at pampalasa ng lutuin. 
• Sala. Malaki ang naitutulong ng pagdaragdag ng mga bagay na nakakapagpaginhawa sa pamamalagi gaya ng malamlam na ilaw, malalambot na kumot, o maging mga sariwang bulaklak. Kadalasang naghahanap ang mga bisita ng mga tuluyang may TV.
• Mga kuwarto. Natutuwa ang mga bisita sa komportableng kutson na may mesa sa tabi ng higaan at ilaw na maaabot mo mula sa higaan.
• Mga banyo. Bukod pa sa sabon, puwede kang maglagay ng shampoo, conditioner, at lotion. Pinakamadaling imentena ang mga puting tuwalya at puwedeng i‑bleach ang mga ito anumang oras.

Hindi mo kailangang alisin ang bawat personal na gamit. Nakakatulong ang mga obra ng sining, libro, o throw pillow para maging kaaya‑aya ang patuluyan mo. 

• Itabi ang mahahalagang gamit. Kung mayroon kang alahas, mga pasaporte, o mga katulad na gamit, puwede mong itabi ang mga ito sa nakakandadong kuwarto, aparador, o kaha de yero, o kaya, ipatabi ang mga ito sa mga kapamilya o kaibigan mo.
• Alisin ang mga bagay sa mga ibabaw. Para mapanatiling malinis ang patuluyan, puwede mong itabi ang maliliit na kasangkapan. Halimbawa, ilagay sa kabinet ang mga kasangkapang gaya ng toaster o hair dryer.
• Maglaan ng taguan ng gamit. Kailangan ng mga bisita ng mga mapaglalagyan ng mga damit, gamit sa banyo, at bagahe, kaya puwede kang magtanggal ng laman ng ilang drawer at maglaan ng espasyo sa aparador.

Isa sa mga nangungunang salik sa mga review ng bisita ang kalinisan. Gagawin mo man ito nang mag-isa o kukuha ka ng tutulong sa iyo, napakahalagang bahagi ng pagho-host ang pagtitiyak na nalinis nang mabuti ang patuluyan mo bago dumating ang mga bisita.

• Magtakda ng routine. Nakakatulong ang mga checklist sa paglilinis para matiyak na walang napapalampas kapag nagpalit ka ng mga bisita.
• Linisin ang bawat kuwarto. Punasan ang lahat ng ibabaw, walisan o i-vacuum, at i-mop ang sahig.
• Pagtuunan ang mga bahagi ng tuluyan na madalas gamitin.Partikular na pagtuunan ang mga banyo at kusina. 

Kung gusto mo ng patnubay sa pagse‑set up ng patuluyan mo, puwede kang makakuha ng libreng iniangkop na suporta mula sa Superhost Ambassador, o puwede kang maghanap ng co‑host na tutulong sa lahat, mula sa pagse‑set up ng listing mo hanggang sa pagho‑host sa patuluyan mo.

Posibleng nagbago na ang impormasyong nakasaad sa artikulong ito mula noong na-publish ito.