Pagsisigurong malinis ang iyong patuluyan
Pinakamahalagang bahagi ng five-star na hospitalidad ang pag-aalok ng malinis na patuluyan. Bilang bahagi ng mga pangunahing alituntunin para sa mga host, kailangang malinis at walang panganib sa kalusugan ang lahat ng patuluyang naka-list sa Airbnb kapag nag-check in ang mga bisita. Mas malamang na magtagumpay ang mga host na may mahusay na diskarte sa paglilinis.
Gumawa ng diskarte sa paglilinis
Ikaw man ang naglilinis o kumukuha ka ng tagalinis, napakahalagang linisin nang mabuti ang iyong patuluyan sa tuwing may aalis at darating na bisita.
Kung may mahanap na buhok sa banyo o maruruming pinggan sa lababo ang mga bisita, masisira ang pamamalagi nila. Puwede silang magbigay ng hindi magandang review o umalis nang maaga dahil dito.
Kung kumukuha ka ng tagalinis, suriin mo ang proseso ng paglilinis para malaman mo kung ano mismo ang kailangang gawin. Tiyaking makakapag-iskedyul ka nang sapat na panahon sa pagitan ng mga booking para magawa nang maayos ang paglilinis. Humanap ng pangalawang tagalinis o umisip ng backup na plano sakaling hindi makarating ang tagalinis.
Subukan ang mga tip na ito mula sa ibang host sa pagpaplano mo:
- Unahing alisin ang mga kubrekama at magsalang ng labahin para may oras kang magsalang ulit ng karagdagang labahin kung kinakailangan.
- Linisin at tanggalan ng alikabok ang lahat ng ibabaw at pagtuunan ng pansin ang mga madalas hawakan, tulad ng mga remote at doorknob.
- Ayusin ang mga higaan, palitan ang mga tuwalya, ibalik sa puwesto ang mga dekorasyong kumot at unan, at gumamit ng lint roller sa anumang may kailangan nito.
- Buksan ang mga bintana habang naglilinis para pumasok ang sariwang hangin kung maganda ang lagay ng panahon.
- Ihuli ang pagwawalis at pagpupunas ng sahig para makuha ang anumang alikabok o dumi.
Sundin ang checklist para sa paglilinis na ito
- Inaalisan ng alikabok at nililinis ang lahat ng ibabaw.
- Vina-vacuum o winawalisan at pinupunasan ang lahat ng sahig.
- Walang insekto, peste, sapot, amag, at mantsa ang lahat ng lugar.
- Malinis, bagong laba, at walang mantsa ang lahat ng linen at tuwalya.
- Inaayos, pinapagpag, at inaalisan ng himulmol ang lahat ng higaan.
- Nililinis at dinidisimpektahan ang lahat ng toilet, lababo, shower, at tub.
- Muling naglalagay ng shampoo, body wash, sabon sa kamay, o sabong panghugas.
- Itinatago ang lahat ng personal na gamit.
- Hinuhugasan at itinatabi ang lahat ng pinggan, lutuan, at kubyertos.
- Nililinis at inihahandang magamit ang lahat ng kasangkapan sa kusina, kasama ang refrigerator, kalan, at oven. Walang iniiwang tirang pagkain sa refrigerator.
- Nilalabas ang lahat ng basura.
- Mabango at malinis ang amoy ng tuluyan.