Magdagdag ng mga detalyeng magugustuhan ng mga bisita

Kapag pumasok ang mga bisita sa The Beach Lodge sa Hollywood Beach, California, nagkakaroon agad sila ng ideya kung sino si Tiffany Caliva-Talledo. Nararamdaman ang kanyang pagiging maalalahanin at pagmamahal sa disenyo sa kanyang pagpili sa mga dekorasyon—ang mga kulay, texture, at bawat iniangkop na detalye. Bilang dating creative director, lagi niyang napapansin ang mga detalye. Ibinahagi niya rito ang kanyang mga sikreto sa pagtatagumpay sa Airbnb.

"Bago namin inayos ang The Beach Lodge, pangit at nasisirang berdeng tuluyan ito. Tinawag ito ng mga tao na ‘Drug Den’ at iniiwasan nila ito dati kapag dumadaan sila! Inakala ng mga kapitbahay na baliw kami sa pagbili nito, ngunit may nakita akong espesyal dito—at naisip ko na kung maibabalik namin ito sa dating anyo, darating ang mga tao. Labis-labis ang pagmamahal na ibinuhos ko rito—at sa palagay ko, iyon mismo ang dahilan kung bakit bumabalik ang mga bisita.”

Magtakda ng mood
“Laging nagsisimula sa pagtatakda ng tamang mood ang paggawa ng mga karanasang hindi malilimutan. Kapag nagdidisenyo ng tuluyan, sinasabi ko sa aking mga kliyente na magsimula sa pakiramdam sa halip na tema. Ano ang gusto mong maramdaman ng iyong mga bisita sa kanilang pagpasok sa iyong tuluyan—kaginhawaan, kagalakan, katahimikan? Para sa The Beach Lodge, sa halip na gawin ang literal na temang tabing-dagat, pinag-isipan ko ang pangkalahatang mga kulay, texture, at detalye: mga pattern na lumilitaw mula sa maaliwalas na paligid, mga texture na nagpapanariwa sa paghaplos sa buhangin, at maraming halaman para dalhin ang labas sa loob."

Magdisenyo nang may badyet
"Hindi kailangang maging mahal ang pagpapalamuti ng tuluyan! Puno ang mga flea market at thrift store ng mga murang gamit at mga natatanging item na tila may mga kuwento. Kailangan mo lang maghanap nang kaunti. Lalo akong na-e-engganyo sa mga bagay na kumakatawan sa lahi kong Filipino at Asian. May ibig sabihin dapat ang mga item na pinipili mo para sa iyong tuluyan, at makakatulong ang mga ito na iparating ang kabuuang kuwento ng iyong tuluyan.”

Maging malikhain
"Isa pang payo na ibinabahagi ko sa aking mga kliyente ang pagpapahintulot sa iyong sarili na maging malikhain. Baguhin ang dekorasyon. Sumubok ng mga bago. Gumawa ng mga pagbabago para sa bawat panahon. Ito ang pinakamahusay na paraan para matuklasan kung ano ang mainam para sa gusto mong makamit at kung ano ang hindi. Pag-isipan ang iyong tuluyan bilang taong may sariling mga kompleksidad at katangian. Tulad mo, nagpapalit, nagbabago, at umuunlad dapat ito para maging pinakamahusay na bersyon nito sa kasalukuyan."

Gumawa ng mga espesyal na komportableng espasyo
“Gustong-gusto kong paglaruan ang mga espasyo at tampok na kasangkapan sa mga hindi inaasahang paraan. Inirerekomenda kong tip ang paggawa ng mga espesyal na komportableng espasyo sa iba't ibang bahagi ng iyong tuluyan—mga lugar na iniangkop para mainam na makapagbasa ng libro ang mga bisita. Maaaring magdagdag ako ng ilang kumot o unan at ng painting sa sulok para mahikayat ang mga tao na maggrelaks. Pag-isipan kung paano ka makakagawa ng ganitong maliliit na nakagiginhawang espasyo sa tuluyan.”

Gawin itong personal
“Hangga't maaari, tulungan ang mga bisitang iangkop ang kanilang pamamalagi sa pamamagitan ng mga karagdagang espesyal na detalye. Halimbawa, kung may nagbanggit na magdiriwang sila ng kaarawan, mag-iiwan ako ng mga cupcake mula sa aking mga paboritong lokal na panaderya. Kung vegan sila, gagawa ako ng listahan ng mga lokal na restawran. Kung pamilya sila na may mga bata, papalitan ko ng mas matitibay ang mga unan at linen. Talagang kapansin-pansin sa mga bisita ang mga pinag-isipang detalyeng ito. Makikita mo ang mga ito sa iyong mga review at muling pagbu-book sa hinaharap.”

Bigyan sila ng maiuuwing regalo
"Inirerekomenda kong bigyan ang mga bisita ng memento o maitatagong alaala kapag dumating sila bilang simpleng pagpaparamdam na espesyal at malugod silang tinatanggap, tulad ng mga gift card sa mga negosyo sa malapit o mga postcard mula sa mga lokal na manlilikha ng sining."

"Para maisakatuparan pa ang ideyang iyon, magagawa ng mga bisita na direktang bumili ng mga item tulad ng mga eco-conscious na robe at linen at mga vintage piece sa The Beach Lodge, o sa ginawa kong online store. Mahalaga sa akin na nakapagtatampok din ako ng mga brand na lokal at pagmamay-ari ng kababaihan. Wala akong tinatanggap na anumang kita. Tungkol ito sa pag-uugnay ng mga brand na ito sa mga tao. Higit pa ito sa isang bakasyon para sa akin."

Maghanda ng mga libangan
"Pinangalanan naming The Beach Lodge ang aming tuluyan dahil para sa amin, maginhawang lugar ang lodge para makapagtipon-tipon ang mga tao. Naglalagay ako rito ng mga board game, yoga mat, craft, gamit para sa sining, ihawan, tuwalyang pang-beach, bisikleta, librong mababasa, at record player. Para sa pagpapalawak ng iyong mga pananaw ang pagbibiyahe at makakatulong ang mga aktibidad na ito sa mga tao na bumuo ng mga alaala at mga bagong paraan ng pamumuhay. Pag-isipan kung anong mga amenidad ang makakatulong para mapaganda ang kanilang pangkalahatang karanasan."

Tandaang napakahalaga ng mga detalye. Sa pamamagitan ng mga pinag-isipang detalyeng ito, mararamdaman ng mga bisita ang tunay na pagmamalasakit na ibinuhos mo sa iyong tuluyan—at patuloy silang magbabalik.

Matuto pa tungkol sa pagiging host