Hindi available sa pinili mong wika ang nilalamang ito, kaya inihanda namin ito sa pinakamalapit na available na wika sa ngayon.

Makakuha ng mas maraming 5-star na review

Inihayag ng mga interior designer at Superhost kung paano sila gumagawa ng mga di malilimutang pamamalagi.
Ni Airbnb noong May 26, 2021
10 minutong pagbabasa
Na-update noong May 26, 2021

Mga Katangi-tanging Feature

  • Ipaalam sa mga bisita ang dapat asahan bago sila mag-book

  • Mabilis at malinaw na makipag-ugnayan sa mga bisita

  • Panatilihing malinis, komportable, at walang kalat ang iyong lugar

  • Magdagdag ng mga lokal na bagay kung saan puwede, mula sa likhang sining hanggang sa mga produktong pampaligo

  • Bigyan ang mga bisita ng karanasan na gusto mong maranasan kung mamamalagi ka sa patuluyan

  • Matuto pa sa aming kumpletong gabay para mapahusay pa lalo ang iyong pagho-host

Nakapagtayo ng negosyo sa pagdidisenyo ng mga sulit at 5-star na tuluyan ang mga Superhost, negosyante, at interior designer na sina Catherine at Bryan Williamson ng Beginning in the Middle. Nakapaghost na sila ng mahigit 2,000+ bisita at narito sila para ibahagi ang kanilang kuwento at mga ekspertong tip sa kung paano gawing hindi malilimutan ang iyong tuluyan.

Catherine: “Para sa amin, isang masayang di-inaasahang bagay ang napasok namin nang simulan namin ang aming negosyo sa Airbnb at negosyo sa pagdidisenyo. Noong 2013, lumipat kami mula New York City papuntang Columbus, Ohio—doon talaga lumaki si Bryan. Ginusto namin ng mas maluwang na lugar, at naghahanap na pati ng lugar na maaari naming tirhan at idisenyo sa paraang gusto namin.”

Bryan: "Bumili kami ng bahay na may tatlong kuwarto—at heto kami ngayon kailangan naming bayaran ang ilang natitira pang utang para dito. Pero hindi talaga namin nagustuhan ang ideya na magkaroon ng full-time na kasama sa kuwarto."

Catherine: "May kakilala ang isa sa aming kaibigan na ini-list ang kanyang reserbang kuwarto sa Airbnb at iminungkahi niyang subukan namin ito. Noong panahong iyon, hindi talaga namin alam kung ano ang Airbnb. Naisip namin ni Bryan: 'Okay, kung makakakuha lang tayo ng 10 gabing naka-book sa taong ito, napakagandang bagay na iyon...'”

Bryan: “Ini-list namin ito, at nagkaroon ng malaking demand para dito. Hindi nagtagal, ini-list na rin namin ang aming buong bahay. Nag-e-explore at namamalagi kami sa iba't ibang motel sa buong Columbus hanggang sa mahanap namin ang pinakamaayos sa lahat. Dumating sa punto na namamalagi kami roon nang ilang linggo kada pagkakataon. Kilala namin ang lahat ng kawani at tauhan ng hotel. Pero siyempre, hindi iyon sustainable.”

Isang uri ng masining at malikhaing pagpapahayag ang pagho-host para sa amin.
Bryan,
Columbus, OH

Catherine: "Nabayaran namin ang aming utang at nakabili kami kalaunan ng isa pang bahay. Sa paglipas ng ilang taon, nakapagpaayos at nakapagbenta na kami ng ilang patuluyan at itinira ang mga paborito namin sa Airbnb. Umalis kami sa aming mga regular na trabaho, ginawa namin ang aming studio sa interior design (Mix Design Collective), ang tatak ng aming matutuluyang bakasyunan (The Village Host), at sinimulan namin ang aming blog (Beginning in the Middle).”

Bryan: "Para sa amin, talagang mahalaga sa amin ang pagbuo ng espesyal na karanasan para sa bawat isa sa aming mga bisita. At ang passion na iyon sa hospitalidad ang nagbigay-daan sa amin na bumuo ng buhay na talagang gusto namin. Bilang host, mayroon ka mang mga pinakamagarang bahay o wala, kung magagawa mo namang makapagbigay ng natatanging pamamalagi, makikita mong tataas nang tataas ang iyong mga review at rating sa pagpapatuloy.”

1. Magtakda ng mga dapat asahan

Catherine: "Isa sa mga lihim para makakuha ng 5-star na review ang pagpapaalam sa mga bisita ng mga dapat nilang asahan bago nila pindutin ang button na I-book. Luma na ang aming mga bahay, at marami kaming ginawa para gawin ang mga itong parang tahanan, komportable, at maganda. Pero hindi perpekto ang mga ito, kaya sinusubukan naming magbigay ng maraming impormasyon hangga't maaari sa umpisa pa lang. Halimbawa, mayroon kaming mga lumalangitngit na sahig at pinto.”

Bryan: “Medyo maliit ang aming mga banyo. May kahating dingding sa kapitbahay ang isa sa aming mga unit. Sinasabi namin iyon para alam ng mga tao na dapat maging magalang at huwag maging maingay. HINDI puwede ang mga party.”

Catherine: “Mayroon kaming lumang clawfoot bathtub na medyo mas mataas kaysa sa karaniwang bathtub—kung sakaling may anumang pangangailangan para sa accessibility ang mga bisita. Posibleng makaabala ang mga kakaibang bagay na ito sa ilang tao. Baka wala lang ito para sa ibang tao—pero sinusubukan naming kausapin ang taong alam naming masisiyahan sa kapitbahayan at sa bahay.”

2. Maging mabilis sa pagtugon

Bryan: “Mahalagang bahagi ng 5-star na karanasan ang mabilis at malinaw na pakikipag-ugnayan sa mga bisita. Nakatutulong ito na maipakita sa iyong mga bisita na laging ganoon ang pagmamalasakit mo sa kanila.”

Catherine: “Sandaling panahon lang mamamalagi sa iyo ang mga tao—at karaniwang dahil ito sa isang mahalagang bagay—kaya hindi mo gugustuhing maaksaya ang kalahati ng panahong ng kanilang pamamalagi nang walang natatanggap na tugon mula sa iyo o na may ipinapakumpuning sira. Ako ang tipo ng taong tumutugon agad sa loob lang ng 5 minuto, pero kung iniisip mong hindi ka makakatugon sa mga tao sa loob ng makatuwirang oras, pag-isipang magsama ng co-host para tulungan kang sagutin ang iyong mga email at mensahe. Ginagawa namin ang lahat ng aming makakaya para ipakita sa kanila na nandirito kami at nagmamalasakit. At kung minsan nangangahulugan ito na bibitawan mo ang iyong ginagawa para makapagbigay ng 5-star na karanasan.”

Alamin ang tungkol sa pagtatrabaho nang may kasamang co-host

3. Gawin itong sa kanila

Catherine: “Pagdating naman sa iyong palamuti at tuluyan, ang pinakamahalagang bagay ay ang maramdaman ng mga bisita na parang sa kanila ito habang naroon sila. Gumugol ng oras at pagsisikap para palamutian ng mga muwebles na kakaiba sa pakiramdam at pulido ang pagkakayari at disenyo.”

Bryan: “At hindi ibig sabihin nito na kailangan mo pang bumili sa labas at ipa-marmol ang buong kusina, o bilhin ang lahat ng pinakamamahaling bagay. Sa palagay ko ang pinakamahalagang bagay ay malinis, komportable, at wala itong mga kalat.”

Catherine: “Dapat ang pakiramdam ay parang inihanda ito para lang sa kanila. Maglaan ng oras para alisin ang mga personal na litrato, memento ng pamilya, burloloy sa bahay, kalat, at anumang bagay na makapagpaparamdam sa mga bisita na nasa bahay sila ng iba.”

Bryan: "Isang mahalagang elemento na sulit pamuhunanan ay isang komportableng higaan. Muli, hindi naman kailangan ang isang mamahaling kutson, pero magdaragdag kami ng topper at sasamahan ito ng dalawang klase ng unan: isang down at down alternative na unan.”

Catherine: “Para naman sa mga sapin, karaniwan kaming gumagamit ng hindi bababa sa 300 bilang ng hibla, gaya ng ginagamit ng maraming hotel. Malambot dapat ito sa balat at hindi tulad ng papel de liha—dahil sa huli, nagbu-book ang mga tao sa iyong lugar para magpalipas ng gabi sa inyo. At gaya ng alam na natin—lalo na bilang mga magulang—isang kaginhawahan ang makapagpahinga nang mahimbing sa gabi.”

4. Magdagdag ng mga lokal na bagay

Catherine: “Kapag may mga dumarating na tao para mamalagi kasama mo, tandaan na hindi mo lang ipinapagamit ang iyong tuluyan, nagbabahagi ka rin ng karanasan sa iyong lungsod. Nais naming subukan na gawin itong mas personal kung saan makakaya namin. Isang malaking bahagi ng aming DNA sa Columbus ang mga maliliit na negosyo—kaya't masaya kaming maisangkot ang lahat.”

Bryan: “Minsan mag-iiwan kami sa mga bisita ng kaunting sample ng mga lokal na bagay na gustong-gusto namin: mga gift card sa lokal na coffee shop para mahikayat silang i-explore ang kapitbahayan. Nag-ii-stock kami sa aming tuluyan ng shampoo, conditioner, at face wash mula sa isang lokal na kompanyang tinatawag na Cliff Original. Mayroon kaming natural na sabon sa kamay mula sa isang tatak na tinatawag na Glenn Avenue. Mayroon kaming isang set ng mga librong The Columbus Book Project, na ginawa ng lokal na negosyante na hina-highlight ang mga lokal na artist. Isang lungsod na hindi masyadong nabibigyang-pansin ang Columbus, pero isa itong napakagandang lugar para manirahan, lumaki, at bisitahin—at napakarami nitong maiaalok.”

Catherine: "Gustong-gusto naming ipakita sa mga tao ang Columbus kung papaanong nakikita ito ng aming mga mata—at gustung-gusto naming makagawa ng karanasan na mapapasabi ang mga tao na, 'Gusto kong lumipat sa Columbus.’”

Bryan: “Isa pang ideya na sinusubukan naming dalhin sa komunidad ng Columbus ang gamitin bilang art gallery o supper club ang aming mga tuluyan para maipakita ang mga likhang-sining ng mga lokal na artist. Gusto naming ipakita ang ilang piraso sa bawat tuluyan at paikutin ang mga ito kada ilang buwan. Maging malikhain at mag-isip ng mga paraan na masasalamin ng iyong tuluyan ang lokal na kultura.”

5. Pangasiwaan ang mga fire drill

Bryan: “Sa kabila ng matindi mong hangarin at pagsisikap na makagawa ng 5-star na karanasan, darating din talaga ang mga emergency, at kakailanganin mong lutasin ang mga ito—mapa-sirang aircon man iyan o mga dismayadong bisita. Isa sa mga pinakamatinding sitwasyon na naranasan namin ay ang pagsabog na ito ng pangunahing tubo. Dahil dito, binaha ang tuluyan sa panahon ng pamamalagi ng mga bisita. Tawag sila nang tawag sa amin... ”

Catherine: “… Pero nakapatay ang telepono ko.”

Bryan: “… At nangyari pa mismo ito sa gabi ng kanilang kasal."

Catherine: "Napakasama talaga dati. Isang karanasan ito para matuto kami nang husto. Kapag nangyari ang mga bagay na iyon, humingi ng paumanhin at gamitin ang pinakamahusay mong pagpapasya kung dapat ba silang bayaran o kung makakatulong bang magbigay ng regalo tulad ng mga biskwit, bote ng alak, o gift certificate para sa hapunan. Kung talagang hindi nasiyahan ang mga bisita, bibigyan namin sila ng refund, pero hindi ito karaniwang nangyayari.

Bryan: "Sinusubukan naming gamitin ang golden rule na bigyan ang aming mga bisita ng karanasang magugustuhan namin kung mamamalagi kami sa sarili naming lugar. Para sa amin, isang uri ng masining at malikhaing pagpapahayag ang pagho-host. Ibinubuhos namin ang aming puso sa mga patuluyang ito at ipinapagamit ang mga ito sa mga tao. Napakahalaga sa amin na madama ang pagpapahalaga mula sa aming mga bisita."

Catherine: "Pinapatunayan lang ng pagkakaroon ng 5-star na review ang lahat ng ginagawa namin. Kapag nagsasagawa na kami ng pag-aayos, inaasahan naming may isang taong papahalagahan ang lahat ng pagsisikap namin dito. At sa palagay ko, kung sa mga numero ng pamumuhunan sa real estate ka lang nakatuon, madali lang kalimutan ang ilan sa mga dagdag na pagpapagandang ito.”

Bryan: “Hindi madali ang pagho-host. Maraming kailangang gawin."

Catherine: “Pero naging napakasaya nito at binago nito ang aming buhay. Binigyan kami nito ng pagkakataong magawa ang hilig namin para sa interior design at matuklasan ang kagustuhan naming makapagbigay ng hospitalidad. Binigyan kami nito ng kakayahang magsimula ng aming negosyo at tuloy-tuloy na lumago. Sa palagay ko, kung hindi dahil sa Airbnb, mas mahihirapan kaming tahakin ang mundo ng pagmamay-ari ng maliit na negosyo at paunlarin ito. Nakatulong ito para malaman namin kung saan kami naaangkop, at ito ang kagustuhan naming mag-renovate ng mga tuluyan para sa ikasisiya ng ibang tao.”

Bryan: "Nagamit namin ang aming hilig sa pagnenegosyo at pagkamalikhain. Ang ibig sabihin ng pagtamasa ng kasiyahan sa lahat ng aspeto ng buhay ay ang magawa mo ang bagay na hilig mo—at magawa mo ito para sa iyo.”

Catherine: "Umaasa kaming makakatulong ang mga tip na ito para makakuha ka ng mas marami pang 5-star na review.”

Maligayang pagho-host!
Catherine, Bryan + Bianca

Mga Katangi-tanging Feature

  • Ipaalam sa mga bisita ang dapat asahan bago sila mag-book

  • Mabilis at malinaw na makipag-ugnayan sa mga bisita

  • Panatilihing malinis, komportable, at walang kalat ang iyong lugar

  • Magdagdag ng mga lokal na bagay kung saan puwede, mula sa likhang sining hanggang sa mga produktong pampaligo

  • Bigyan ang mga bisita ng karanasan na gusto mong maranasan kung mamamalagi ka sa patuluyan

  • Matuto pa sa aming kumpletong gabay para mapahusay pa lalo ang iyong pagho-host
Airbnb
May 26, 2021
Nakatulong ba ito?