Mga tagubilin para sa pagsulat ng pamagat ng listing

Isa sa mga unang mababasa ng mga bisita sa resulta ng paghahanap ang pamagat ng listing mo, at pagkakataon ito para iparating kung bakit natatangi ang patuluyan mo. Sundin ang mga tagubiling ito para sa pagsulat ng nakakaengganyong pamagat para matulungang mamukod‑tangi ang listing mo sa mga resulta ng paghahanap, gawing interesante ang patuluyan mo, at itakda ang mga dapat asahan ng mga bisita.

Naghahanap sa Airbnb ang mga bisita gamit ang iba't ibang uri ng device na may screen na iba‑iba ang laki. Maganda man ang pamagat para sa web browser, posibleng masyadong mahaba iyon para sa mga bisitang nagso‑scroll sa mga listing sa mobile app.

Kapag sumunod ka sa limitasyong 32 karakter, masisigurong maisasaad ang buong pamagat mo sa mga desktop at mobile device.

Narito ang tatlong magandang halimbawa ng maiikling pamagat ng listing:

• Loft na may tanawing bayan

• Pang‑chef na tuluyan sa bundok

• Villa malapit sa Año Nuevo

Kung mas mahaba sa 32 karakter ang pamagat, unahin ang pinakamahalagang impormasyon. Sa mga resulta ng paghahanap, awtomatikong pinapaikli ang mahahabang pamagat at pinapalitan ng ellipsis ang hindi kasyang bahagi ng pamagat. Halimbawa, magiging “Country cabin na may tanawing lawa…” sa mga resulta ng paghahanap ang pamagat na “Country cabin na may tanawing lawa, firepit, at puwestong pambangka.”

Sa sentence case, ang unang letra ng unang salita sa pamagat ang kailangan lang gamitan ng malaking titik. Puwedeng mas madaling mabasa at mas kaaya‑aya ito kaysa sa title case kung saan ginagamitan ng malaking titik ang unang letra ng karamihan ng salita, o sa MALAKING TITIK LAHAT.

Para mapaganda ang karanasan sa paghahanap ng mga bisita, iwasang gumamit ng malalaking titik sa ibang salita sa pamagat maliban na lang kung pangalan iyon, gaya ng lungsod. Puwede ka ring gumawa ng pagbubukod para sa mga daglat, gaya ng UK o code ng airport na gaya ng LHR.

Narito ang tatlong magandang halimbawa ng mga pamagat ng listing na nasa sentence case:

• Kubo sa tabing‑dagat sa Bondi Beach

• Romantikong Victorian na kuwartong pambisita

• Makakalikasang studio na malapit sa LAX

Puwedeng malito ang mga tao o iba ang maging intindi nila sa mga emoji at simbolo dahil iba‑iba ang kahulugan ng mga iyon sa iba't ibang panig ng mundo. Halimbawa, puwedeng maintindihan ang thumbs up bilang pag‑apruba o pagsang‑ayon, numerong isa, o nakakabastos na senyas.

Para maging mas kaaya‑aya at mas madaling mabasa ang pamagat ng listing mo, gumamit ng mga simple at mapaglarawang salita tungkol sa iyong patuluyan. Ayos lang gumamit ng mga espesyal na karakter (gaya ng !, #, o *) pero hindi mainam na ulitin ang mga ito para magbigay‑diin (gaya ng !!! o ***). Para paghiwa‑hiwalayin ang mga ideya, subukang gumamit ng mga kuwit na sinusundan ng espasyo o isang slash na walang espasyo.

Narito ang halimbawa ng hindi dapat gawin:

• ****Ski at golf chalet****!!!

Narito kung paano ito maisusulat sa mas magandang paraan:

• Ski/golf chalet na may pribadong bakuran

Kadalasang hindi na kailangang ulitin ang anumang impormasyong ibinigay na sa mga bisita sa mga resulta ng paghahanap, gaya ng lungsod o bayan mo o kabuuang bilang ng higaan. Gamitin ang pamagat ng listing para magdagdag ng mga natatanging detalye na makakatulong para mapansin ang listing.

Halimbawa, kung nasa Buenos Aires ang listing mo, puwede mong ilagay sa pamagat ang kapitbahayan mo, gaya ng “Recoleta.” Kung nasa Florence sa Italy iyon, puwede mong isaad ang “malapit sa Uffizi” o iba pang landmark na malapit sa patuluyan mo. O kaya, kung mayroon kang nakatalagang workspace, puwede mong ilagay sa pamagat ang “angkop para sa pagtatrabaho.” Nakakatulong itong linawin ang mahahalagang detalye para sa mga bisita.

Puwede mo ring hindi na ilagay ang salitang “bago” sa pamagat ng bagong listing dahil ipinaparating na sa mga bisita ang impormasyong ito sa pamamagitan ng badge sa mga resulta ng paghahanap.

Basahin ang Patakaran sa Content ng Airbnb

Posibleng nagbago ang impormasyong nakasaad sa artikulong ito mula noong na‑publish ito.