Pag-unawa sa mga setting ng kalendaryo at booking

Maitatakda mo kung kailan ka magpapagamit ng patuluyan, kada katapusan ng linggo man o buong taon, sa mga setting ng kalendaryo at pagbu-book mo. Kung mahusay mong magagamit ang mga setting na ito, mas maayos mong matutugunan ang mga pangangailangan ng mga bisita at mapapatakbo ang negosyong pagho-host mo.

Narito kung paano i-set up ang mga setting ng kalendaryo na naaangkop sa iyo.

Puwede mong gawing available ang mga petsa sa kalendaryo mo hanggang dalawang taon sa hinaharap. Kapag mas maraming available na petsa, mas maraming mapagpipilian ang mga bisita.

Mahalagang siguraduhing napapanahon ang availability mo sa kalendaryo para maiwasan mong magkansela ng mga reserbasyon. Kapag nagkansela ka, maaari kang patawan ng mga bayarin at iba pang penalty, at hindi maganda ang magiging karanasan ng mga bisita.

Ayon kay Kevino na Superhost sa Lungsod ng Mexico, ginagamit niya ang mga setting ng kalendaryo at pagbu-book para:

• I-update ang nakatakdang presyo batay sa demand sa lugar. “Karaniwang naniningil ako nang mas malaki tuwing Oktubre at Nobyembre na itinuturing na panahon kung kailan mataas ang demand sa Lungsod ng Mexico dahil sa maraming pagdiriwang na nagaganap. Gusto ng lahat na rito gunitain ang Araw ng mga Patay!”

• Magtakda ng mga partikular na oras ng pag-check in at pag-check out. “Puwedeng mag-check in ang mga bisita simula 2:00 PM at mag-check out anumang oras bago mag-12:00 PM. Gusto kong madama ng mga bisita na may oras silang magrelaks at mag-almusal bago sila umalis. Naghahanda rin ako ng nala-lock na lugar kung saan maitatabi ng mga bisita ang mga bagahe nila kung gusto nilang manatili sa lungsod pagkatapos mag-check out.”

• Mag-block ng mga petsa na nakalaan para sa pamilya, mga kaibigan, o madadalas na bisita. “May ilang bisita rin ako na palaging bumabalik sa parehong bahagi ng taon kaya bina-block ko na kadalasan ang mga petsang iyon.”

Puwede mo ring gamitin ang iyong mga preperensya sa reserbasyon para:

• Piliin ang haba ng panahong kailangan mo para maghanda para sa mga bisita.

• Magtakda ng minimum at maximum na tagal ng pamamalagi.

• I-sync ang kalendaryo mo sa Airbnb sa iba mo pang kalendaryo online. Kapag na-sync mo ang iyong kalendaryo, maiiwasan mo ang mga dobleng booking at masusuri mo ang personal na iskedyul mo sa iisang lugar.

Itinatala rin sa kalendaryo mo ang mga booking ng mga bisita. Puwede mong piliing isaad o itago ang mga detalye para malaman ang pangmatagalang availability, suriin ang mga dating presyo kada gabi, isaayos ang mga presyo at promo para sa hinaharap, at magplano nang maaga at may kumpiyansa.

Puwede mong itakdang i-book ng mga bisita ang patuluyan mo sa pamamagitan ng Madaliang Pag-book o pagpapadala ng kahilingan sa pagpapareserba.

Sa pamamagitan ng mga kahilingan sa pagpapareserba, paisa-isang tatanggapin ng mga host ang mga pagpapareserba sa loob ng 24 na oras mula nang ipadala ng mga bisita ang mga iyon. Kadalasang pinipili ang pamamaraang ito ng mga host na:

• Hindi tiyak ang availability dahil sa kanilang mga personal na pangangailangan at iskedyul.
• Nag-aalok ng patuluyang may mga natatanging katangian, gaya ng mga talagang payak na patuluyan, at gustong ipaalam sa mga bisita ang mga maaasahan bago sila mag-book.
• Nag-aalok ng mas matatagal na pamamalagi na 28 gabi o higit pa.

Sa pamamagitan ng Madaliang Pag-book, madaliang makakapagpareserba sa anumang available na petsa ang mga bisitang nakakatugon sa lahat ng itinakda mong rekisito at sumasang-ayon sa mga alituntunin sa tuluyan mo. Pinapabilis ng tool na ito ang proseso ng pagpapareserba para sa mga bisita at hindi mo na palaging kailangang suriin at tanggapin ang bawat kahilingan sa pagpapareserba.

“Sinubukan kong i-post ang listing ko gamit muna ang mano-manong pagpapareserba, saka ako gumamit ng Madaliang Pag-book,” sabi ni Kevino. “Mas marami akong natanggap na booking gamit ang Madaliang Pag-book.”

Sa pamamagitan ng mga ito at iba pang setting, makokontrol mo kung kailan at paano mabu-book ang patuluyan mo at makakabuo ka ng kalendaryo sa pagho-host na naaangkop sa iyo.

Posibleng nagbago ang impormasyong nakasaad sa artikulong ito mula noong na-publish ito.