Madadaling paraan para gawing mas sustainable ang tuluyan mo

Halos 80% ng mga host sa Airbnb ang nagsasabi na mayroon silang hindi bababa sa isa na sustainable na gawain.*

Kapag ginawa mong mas sustainable ang patuluyan at gawain mo sa pagho‑host, makakabawas ka sa gastos, mamumukod‑tangi ang listing mo, at mahihikayat ang mga bisita na gayahin ka.

Subukan ang mga tip na ito mula sa mga host at mga partner namin sa Leave No Trace at World Wildlife Fund.

Makakatulong ang maliliit na pagbabago para makatipid ng kuryente.

• Maglagay ng power strip. Gumagamit pa rin ng kuryente ang mga TV, DVD player, at stereo kahit naka‑standby ang mga iyon. Isaksak sa power strip ang mga device para madaling i-off ang mga ito nang hindi inaalis sa saksakan.** 
• Palitan ang mga bombilya. Mas kaunti ang init na inilalabas ng mga bombilyang mas mababa ang watt. Mas kaunting kuryente ang nakokonsumo ng mga ito. Gumagamit ang mga LED ng hanggang 90% mas kaunting kuryente at 25 beses na mas nagtatagal ang mga ito kaysa sa mga tradisyonal na incandescent na bombilya.**
• Gawing matatag laban sa panahon ang tuluyan mo. Maglagay ng weather stripping sa mga pinto at i‑insulate ang mga bintana para makatipid sa pagpapainit at pagpapalamig.
• Mag‑install ng smart thermostat. Kapag may thermostat na gumagamit ng wifi, maa-adjust mo ang temperatura kahit malayo ka para maisabay ito sa pagdating at pag‑alis ng mga bisita. 
• Suriin ang mga appliance. Kapag oras nang palitan ang mga ito, pumili ng matataas ang rating sa pagtitipid ng kuryente. Karaniwang gumagamit ang mas lumang washing machine ng humigit‑kumulang 31 galon ng tubig kada laba. Samantala, gumagamit ang mga mas bago at mas matipid na modelo ng 13 galon kada laba.**

Subukang hanapan ng panibagong gamit ang mga bagay at item na mayroon ka na bago bumili ng bago. 

• Maglagay ng na-reclaim at segundamanong kagamitan. Maghanap ng de-kalidad, na-reclaim o segundamanong muwebles at fixture sa mga lokal na estate sale, thrift shop, at tiangge.
• Ayusin bago palitan. Puwedeng mas tumagal pa ang upuang nilagyan ng bagong upholstery o aparador na pininturahan o binarnisan ulit kaysa sa bago. Nakakadagdag din ito ng karakter sa tuluyan mo kaysa sa kagamitang bibilhin pa sa tindahan.
• Ibigay sa iba ang hindi mo na kailangan. Kung nagpapaganda ka ng kuwarto, ibigay sa lokal na organisasyong nagre-recycle ang mga muwebles, linen, o elektronikong gamit na gumagana pa.

Limitadong likas-yaman ang malinis na tubig. May mga simpleng bagay kang magagawa para matipid ito.

• Tingnan kung may tagas. Mahigit 3,000 galon ng tubig ang nasasayang kada taon dahil sa gripong may tagas.** Regular na inspeksyunin ang mga palikuran, gripo, at kasangkapan. Masusubaybayan ng mga smart water meter ang paggamit ng tubig at aabisuhan ka ng mga ito kapag posibleng may tagas. 
• Mag‑install ng mga fixture na hindi malakas gumamit ng tubig. Kasama ang mga gripo at inodorong hindi malakas gumamit ng tubig, pati inodorong dual-flush. Gumagamit ang mga inodorong gawa noong 1992 o mas luma pa ng 3.5 hanggang 7 galon kada flush. Samantala, gumagamit ang mga mas bago at mas matipid na modelo ng wala pang 1.3 galon.** 
• Gamitin ang mga setting na matipid sa tubig. Hikayatin ang mga bisita na gamitin ang quick-wash o eco setting sa mga washing machine at dishwasher kung may mga ganitong amenidad sa patuluyan mo.
• Mag‑iwan ng mga paalala para sa mga bisita. Nagpapaskil si Patricia na Superhost sa Manila sa Pilipinas ng note sa banyo na humihiling sa mga bisita na maging maingat sa paggamit ng tubig at pag‑isipang gamitin ang mga tuwalya nang mahigit isang beses.

*Batay sa survey ng Airbnb sa mahigit 77,000 host sa iba't ibang panig ng mundo mula Setyembre 2024 hanggang Mayo 2025.

**Ayon sa mga tip sa pagiging makakalikasan ng World Wildlife Fund. 

Posibleng nagbago na ang impormasyong nakasaad sa artikulong ito mula noong na‑publish ito.