Pagtatakda ng presyo para sa mas matatagal na pamamalagi

Halos isa sa bawat limang gabing na-book sa Airbnb ang bahagi ng pamamalaging 28 gabi o mas matagal pa.*Kadalasang may mga ganitong kagandahan ang pagho‑host ng mga lingguhan at buwanang pamamalagi:

• Mas mataas na rate sa pagpapatuloy nang mas madalang ang pagpapalit ng bisita

• Mas kaunting mensahe at pangangailangan ng mga bisita na dapat asikasuhin

• Mas maaasahang kita kumpara sa mas maiikling pamamalagi

Karaniwang naghahanap ng mga tuluyan na may diskuwento ang mga bisitang gustong mamalagi nang mas matagal. Puwedeng magdagdag ang mga host ng lingguhang diskuwento para sa mga booking na pitong gabi o mas matagal pa, o ng buwanang diskuwento para sa mga booking na 28 gabi o mas matagal pa.

Kapag nagdagdag ng mga ganitong diskuwento, puwedeng tumaas ang puwesto ng listing mo sa mga resulta ng paghahanap kung saan itatampok ang lingguhan o buwanang diskuwento sa tabi ng orihinal na presyo.

Bago magtakda ng diskuwento, mainam na alamin mo ang lokal na demand. Kung nagho‑host ka sa lugar na dinarayo ng mga tao depende sa panahon, pag‑isipan kung mas makakabuti sa diskarte sa presyo mo kapag nagbago ka ng presyo para sa mga partikular na buwan.

Mainam ding isaalang‑alang mo ang mga regular na gastos, gaya ng:

• Mortgage o upa. Puwedeng ang halagang ito ang una mong pagbatayan para sa pagtatakda mo ng lingguhan o buwanang diskuwento.

• Mga gastusin sa bahay. Puwedeng isaalang‑alang sa presyo ang binabayaran mo para sa mga utility (tubig, gas, kuryente), mga regular na nakaiskedyul na serbisyong gaya ng paglilinis at paghahardin, at mga gamit na pipiliin mong ilaan para sa mga bisita (dagdag na sabon, mga pangunahing kailangan sa pagluluto, atbp.).

• Pagmementena. Puwedeng isaalang‑alang sa presyo ang halagang ginugugol mo sa patuluyan mo para maging mas komportable iyon para sa mga bisita, gaya ng mga pagpapaganda at pagpapaayos.

“Mainam na kalkulahin ang kinikita mo sa isang buwan nang binabayaran ng mga bisita ang itinakda mong presyo kada gabi,” sabi ni Oliver na host sa Lungsod ng New York. “Pagkatapos, puwede mong ayusin ang buwanang diskuwento para matumbasan ang kabuuang halagang iyon at magkaroon ka ng mas maaasahang kita.”

Puwede kang magdagdag ng mga diskuwento gamit ang mga tool para sa pagtatakda ng presyo sa kalendaryo mo. Piliin ang icon ng mga setting sa kanang bahagi sa itaas. Sa tab na Presyo, mag-scroll papunta sa Mga diskuwento at piliin ang Lingguhan o Buwanan.

May lalabas na iminumungkahing diskuwento batay sa listing mo at sa demand para sa mga katulad na listing sa lugar. Igalaw ang slider sa pagitan ng 0 at 99% para ayusin ang diskuwento at subaybayan kung paano nito binabago ang average na lingguhan o buwanang presyo ng listing mo. Puwede ka ring mano‑manong maglagay ng numero sa tabi ng percent sign. Kapag tapos ka na, i‑tap o i‑click ang I‑save para itakda ang gusto mong diskuwento.

Para malaman kung paano makakaapekto ang diskuwento sa mga kita mo, piliin ang mga salitang “presyong babayaran ng bisita” sa ibaba ng lingguhan o buwanang presyo. Makakakuha ka ng detalye ng presyo kung saan nakasaad ang presyo kada gabi, mga bayarin, anumang diskuwento o promo, mga buwis, at mga kita mo.

Puwede ka ring mag‑alok ng mga diskuwento sa mga bisitang magbu‑book nang maaga o nang malapit sa takdang petsa ng pagdating nila. Pumunta sa seksyong “Higit pang diskuwento” sa tab na Presyo. Ilagay ang bilang ng buwan para sa mga maagang magbu‑book o ang bilang ng araw para sa mga pahabol na magbu‑book at ang porsyento ng diskuwento na gusto mo para sa mga booking na iyon.

*Batay sa internal na pandaigdigang datos ng Airbnb, mga pamamalaging 28 gabi o mas matagal pa ang bumubuo sa 21% ng mga gabing na‑book noong 2022 at 18% ng mga gabing na‑book sa unang tatlong buwan ng 2023.

Posibleng nagbago ang impormasyong nakasaad sa artikulong ito mula noong na‑publish ito.